දිස්ත්‍රික්ක 10ක නායයෑම් අධි අවදානම් කලාපයන්හි පදිංචිව සිටි පවුල් 2866කට මුල් බිමේ පදිංචිවීමට අවසර දිය නොහැකි බව ජාතික ගොඩනැගිලි පර්යේෂණ සංවිධානයේ නායයෑම් පර්යේෂණ හා අවදානම් කළමනාකරණ අංශයේ අධ්‍යක්ෂ ආර්.එම්.එස්.බණ්ඩාර මහතා පැවසීය.

කෑගල්ල දිස්ත්‍රික්කයේ පවුල් 1762ක්, මහනුවර 652ක්, රත්නපුර 230ක්, නුවරඑළියේ 114ක්, මාතලේ පවුල් 42ක්, කුරුණෑගල 31ක්, ගාල්ලේ 15ක් හා කොළඹ හා ගම්පහ පවුල් 15ක් මෙලෙස ඉවත් කැ තිබෙන බවද අධ්‍යක්ෂවරයා සඳහන් කළේය.

බදුල්ල, හම්බන්තොට දිස්ත්‍රික්කයන්හි නායයෑම් ලක්ෂණ පෙන්නුම් කරන ස්ථාන 661ක් පිළිබඳ පරීක්ෂණ ආරම්භකර ඇතැයිද හේ ප්‍රකාශ කළේය.

මේ අතර ගංවතුරෙන් පසු ඇතිවන තත්ත්වයන්ගෙන් ජනතාව මුදවා ගැනීම සඳහා සිවිල් ආරක්ෂක දෙපාර්තමේන්තුව කටයුතු ආරම්භ කර ඇත. කොළොන්නාව ග්‍රාම සේවා වසම් 38ක, අවිස්සාවේල්ල, සීතාවක, කඩුවෙල පෙදෙස්වල ගංවතුරෙන් විනාශවූ පොදු ස්ථාන මාර්ග ආදිය සුද්ධ පවිත්‍ර කිරීම් කටයුතු භටයින් 1000කට අධික පිරිසකගේ සහභාගිත්වයෙන් ඇරඹිණි.