පරිවාස හා ළමාරක්ෂණ සේවා දෙපාර්තමේන්තුවට පැමිණිල්ලක්

(නිමල කොඩිතුවක්කු)

අවාසනාවන්ත ලෙස පියා සහ බාප්පාගේ පහර දීමෙන් ඝාතනයට ලක්වූ ගම්පොල  දැරියගේ  මව සහ අනෙකුත් සහෝදරියන් දෙදෙනාගේ ආරක්ෂාව කෙරෙහි අවධානය යොමු කරන ලෙස ඉල්ලමින් සමගි වනිතා බලවේගය පරිවාස හා ළමාරක්ෂණ සේවා දෙපාර්තමේන්තුව වෙත අද (27) පැමිණිල්ලක් ඉදිරිපත් කරනු ලැබීය.

මෙම සිද්ධිය සම්බන්ධයෙන් සිදුකරන විමර්ශන කඩිනම් කිරීමට මැදිහත් වන්නැයි ඉල්ලා සිටින බවත් සමගි වනිතා බලවේගය ඉදිරිපත් කළ එම පැමිණිල්ලේ දැක්වේ.

සමගි වනිතා බලවේගයේ ජාතික සංවිධායක  හිටපු පාර්ලිමේන්තු මන්ත්‍රී හිරුණිකා හිරුණිකා ප්‍රේමචන්ද්‍ර මහත්මිය විසින් මෙම පැමිණිල්ල සිදු කර ඇති අතර සමගි වනිතා බලවේග නියෝජිතවරියන් වන හිටපු පළාත් සභා මන්ත්‍රී නිරෝෂා අතුකෝරළ මහත්මිය ඇතුළු පිරිසක් මෙම පැමිණිල්ල භාර දෙනු ලැබීය.

මෙවැනි අධම ක්‍රියා සම්බන්ධයෙන් සහ ඒවා වැළැක්වීම සම්බන්ධයෙන් දැඩි තීරණ ගන්නා ලෙසත්   සමගි වනිතා බලවේගය එම පැමිණිල්ල මගින් වැඩිදුරටත් ඉල්ලීමක් කරයි.