(සුජිත් හේවාජුලිගේ සහ  අංජුල මහික වීරරත්න)

පාර්ලිමේන්තුවේ කටයුතු අද (5) පැය හතරකට පමණ සීමාවිය.

පාර්ලිමේන්තුවේ කටයුතු මෙසේ පැය හතරකට  සීමාවූයේ  මුලසුනේ සිටි නීතිඥ ප්‍රේමනාත් සී දොලවත්ත මහතා විසින් පාර්ලිමේන්තුව හෙට (6) පෙරවරු 10.00 දක්වා කල් තබනු ලැබීම නිසාය.

පාර්ලිමේන්තුව අද පෙරවරු 10 ට පමණ ආරම්භ වූ අතර එය මෙසේ කල් තබනු ලැබුවේ  පස්වරු 2.10ට පමණය.

වෙනත් වැඩකටයුතු නැති හෙයින් සභාව කල් දමන්නැයි සභානායක දිනේෂ් ගුණවර්ධන  මහතා මෙහිදී  මුලසුනෙන්  ඉල්ලීමක් කළේය.

මෙහිදී විපක්ෂ නායක සජිත් ප්‍රේමදාස මහතා අදහස් දක්වමින් පැවසුවේ  තමන්ගේ තවත් කථිකයන් සිටින හෙයින් සභාවේ කටයුතු තවදුරටත් පවත්වාගෙන යන ලෙස ඉල්ලීමක් කරන බවයි.

එහෙත් සභානායකවරයා ඊට එකඟ වූයේ නැත.

පාර්ලිමේන්තුවේ ඊයේ සාකච්ඡාවට ගැනුණේ රටේ වර්තමාන තත්ත්වය පිළිබඳවය.

ආණ්ඩු පක්ෂයේ සහ විපක්ෂයේ මන්ත්‍රීවරු රැසක් එහිදී අදහස් දැක්වූහ.