(මහින්ද නිශ්ශංක)

අන්තර්ජාලය ඔස්සේ භාන්ඩ ඇණවුම් කළ පාරිභෝගිකයින් 100දෙනෙකුගෙන් මුදල් අයකර ඇතත් ඇණවුම් කළ භාණ්ඩ  ඔවුන් වෙත ලබානොදුන් අන්තර්ජාලය ඔස්සේ භාණ්ඩ බෙදා හරින ආයතනයක් කඩුවෙල ප‍්‍රදේශයෙන් අල්ලා ගැනීමට පාරිභෝගික කටයුතු අධිකාරිය පස්වරුවේ සමත්විය.

පාරිභෝගිකයින්ගෙන් ලැබුණු පැමිණිලි මත සිදුකළ පරීක්‍ෂාවකදී මෙම වංචනික ආයතනයට සම්බන්ධ කොළඹ ප‍්‍රදේශයේ නියෝජිතයකු ඇතුළු සේවකයින් පස්දෙනෙකුද අධිකාරිය මඟින් අත්අඩංගුවට ගෙන තිබේ.

මෙම වෙළද ආයතනයේ සදහන් ලිපිනය සම්බන්ධව සිදුකළ සොයා බැලීමේදී එවැනි වෙළද ආයතනයක් ඔවුන් දක්වා තිබු කඩුවෙල කොරතොට ප‍්‍රදේශයේ නොමැති බවත් එය ව්‍යාජ ලිපිනයක් බවත් අධිකාරීයේ ප‍්‍රකාශකයෙක් පැවසීය.

පාරිභෝගිකයින් ලැබුණු පැමිණිලි අනුව කඩුවෙල කොරතොට ප‍්‍රදේශයේ නවතා තිබු මෝටර් රථයක් පරීක්‍ෂා කළ අධිකාරියේ නිලධාරීන්ට එහි සිටි පුද්ගලයින් තිදෙනෙකු අල්ලා ගෙන ප‍්‍රශ්න කිරීමේදී මෙම වෙළද ආයතනයට අයත් ගබඩාවක්ද සොයා ගැනීමට හැකිවී තිබේ.

මෙම ගබඩාව පරීක්‍ෂා කිරීමේදී එහි තිබු යෝගට් සහ මිදි කල් ඉකුත් වු ඒවා බවටද අනාවරණය වු බව අධිකාරිය පවසයි.

ඔන්ලයින් ක‍්‍රමයට භාන්ඩ බෙදා හරින මෙම ආයතනය පාරිභෝගිකයින්ගෙන් නියමිත මුදලට වඩා වැඩි මුදලක් භාන්ඩ සදහා අයකර ඇතැයි හෙළි වු බවද පැවැසු අධිකාරියේ නිලධාරියා භාන්ඩ ලබානොදී මුදල් අයකළ සහ වැඩිපුර මුදල් අයකළ පාරිභෝගිකයන්ට මෙම සතිය තුළදී වැඩිපුර අයකළ මුදල් සහ ලබානොදුන් භාන්ඩ ලබාදීමට පියවර ගන්නා ලෙස එම වෙළද ආයතනයට නියෝග කළ බවද පැවසීය.

මෙම වංචාව සම්බන්ධයෙන් අත්අඩංගුවට ගනුලැබු එම ආයතනයේ කොළඹ නියෝජිතයා ඇතුළුසේවකයින් පස්දෙනා බැදුම්කර මත මුදාහළ අතර ඔවුන්ට විරුද්ධව අධිකරණයේ නඩු පැවරීමට අධිකාරිය පියවර ගෙන තිබේ.

පාරිභෝගික අධිකාරියේ බස්නාහිර පළාත් සහකාර අධ්‍යක්‍ෂක ඒ.ඒ. ජසුර් සහ විමර්ශන නිලධාරී දමින්ද අරුණ කුමාර යන මහත්වරු මෙම වැටලීම සිදුකළහ.