(දිලීප් ජයසේකර)

හම්බන්තොට පහළ අන්දරවැව ප්‍රදේශයේදී අධිබලැති පුපුරණ ද්‍රව්‍ය කිලෝ ග්‍රෑම් 250 කට වැඩි ආසන්න ප්‍රමාණයක් අත්අඩංගුවට ගන්නා ලදි.

හම්බන්තොට පහළ අන්දරවැව ප්‍රදේශයේ මාර්ගයේ ගමන් කරමින් තිබු කුඩා ලොරියක් නවත්වන ලෙස සංඥා කළද එය නොනවත්වා ධාවනය කර තිබේ.  පසුව ලොරිය හඹා ගිය සුරියවැව වල්සපුගල  පොලිස් විශේෂ කාර්ය බළකා නිලධාරීන් විසින් අද (15) පෙරවරුවේ මෙම ලොරිය සහ පුපුරණ ද්‍රව්‍ය  අත්අඩංගුවටගනු ලැබ තිබේ.

ලොරියේ තිබී ඇමෝනියම් නයිට්ට්‍රේට් කිලෝ 25 කොට්ට 09ක්, අධිබළැති පුපුරණ ද්‍රව්‍යක් වන ජෙලට් නයිට් කූරු 196ක් සහ විදුලි ඩෙටනේටර් 100ක්  අත්අඩංගුවට ගනු ලැබ ඇත.

පුපුරණ ද්‍රව්‍ය ප්‍රවාහනය කළ ලොරිය සහ රියදුරාද අත්අඩංගුවට ගෙන ඇත. සුරියවැව පොලිස් විශේෂ කාර්ය බළකා නිලධාරීන් ලද ඔත්තුවකට අනුව මෙම පුපුරණ ද්‍රව්‍ය  තොගය සොයා ගැනීමට හැකි වි  තිබේ.

සැකකරු වැඩිදුර විමර්ෂණ කටයුතු සදහා හම්බන්තොට පොලිසියට බාර දි තිබේ. පුපුරණ ද්‍රව්‍ය තොගය සමඟ අත්අඩංගුවට පත් සැකකරු හම්බන්තොට මහේස්ත්‍රාත් අධිකරණයට ඉදිරිපත් කිරීමට නියමිතය.