(කේ බුද්ධික කුමාරසිරි)

විජයදාස රාජපක්ෂ මහතා ශ්‍රි ලංකා නිදහස් පක්ෂයේ සභාපතිවරයා ලෙස පත් කර ගැනීමට පක්ෂයේ විධායක සභාව ගත් තීරණයට බාධා කිරීම සියලු පාර්ශව වලට වළක්වාලමින් කඩුවෙල දිසා අධිකරණය මගින් ලබා දී තිබූ වාරණ නියෝගය ලබන (31) දින දක්වා දීර්ඝ කිරීමට කඩුවෙල දිසා විනිසුරු දුලානි වික්‍රමසූරිය මහත්මිය අද (28) දින නියෝග කලාය.

ඒ සම්බන්ධයෙන් වූ වැඩිදුර විභාගය අද (28) දින කඩුවෙල දිසා අධිකරණයේදී යළි විභාග වූ අතර විජයදාස රාජපක්ෂ මහතාට ශ්‍රි ලංකා නිදහස් පක්ෂයේ කටයුතු බාදාවකින් තොරව කරගෙන යාමට බාදා නොකරන ලෙසට පනවා තිබූ වාරණ නියෝගය ඉවත් කරන ලෙසට ඉල්ලමින් වග උත්තරකාර පාර්ශවය විසින් ගොනුකර තිබූ පෙත්සම වෙනුවෙන් කරුණු තහවුරු කිරීම ද එහිදී සිදු විය.

එදින පස්වරු 1.30 ට ආරම්භ වූ නඩු විභාගය පැය පහකට ආසන්න කාලයක් විභාග වූ අතර ඉදිරිපත් වූ සියලු කරුණු සලකා බලා ලබන 31 වෙනි දින යළි නඩු විභාගය පවත්වා නියෝගයක් ලබා දෙන බවද අධිකරණය තීරණය කරන ලදී.

ඉකුත් 13 වෙනි දින ශ්‍රි ලංකා නිදහස් පක්ෂයේ විධායක සභිකයින් දෙදෙනෙකු වන ඉසුරු අබේවර්ධන සහ සුමිත් සොයිසා යන මහත්වරු විසින් තම පක්ෂයේ විධායක සභාව ගත් තීරණය අනුව විජයදාස රාජපක්ෂ මහතාට පක්ෂයේ කටයුතු කරගෙන යාමට බාධා නොකරන ලෙස වග උත්තරකරුවන් 20 දෙනෙකුට නියෝගයක් කරන ලෙස ඉල්ලා දිසා අධිකරණය හමුවේ ඉල්ලීමක් සිදු කර තිබුණි.

මෙම නඩු විභාගය වන අවස්ථාවට ශ්‍රි ලංකා නිදහස් පක්ෂයේ වැඩ බලන සභාපති අමාත්‍ය නිමල් සිරිපාල ද සිල්වා වැඩ බලන මහ ලේකම් දුමින්ද දිසානායක නීතිඥ පයිසර් මුස්තාපා ආදී පිරිසක් අධිකරණය වෙත පැමිණ සිටි ආකාරය දක්නට ලැබුණි .