(පියදාස සමරවීර)

පාසල් නිවාඩු කාලයෙත් නිවාඩුවක් නොගෙන සිසු දරුවන්ට නොමිලේ අකුරු කරන පාසලක ගුරුභවතුන් පිරිසක් සම්බන්ධ තොරතුරු පදවියෙන් වාර්තාවේ.

පදවිය අධ්‍යාපන කොට්ඨාසයට අයත් පදවිය සී යාය විදුහලේ විදුහල්පතිනිය ඇතුළු ගුරු මණ්‌ඩලය මෙම උතුම් සද් ක්‍රියාවට දායක වී තිබේ.

10 , 11 ශ්‍රේණිවල සිසු දරුවන්ට සතියේ දින පහේම හා අනෙකුත් පන්තිවලට සතියට දින තුනක් පන්ති පවත්වා දරුවන්ගේ අධ්‍යාපන තත්ත්වය නගා සිටුවීමට මෙම පාසලේ විදුහල්පතිනිය ඇතුළු ගුරු මණ්‌ඩලය කටයුතු කිරීම මවුපිය ගෞරවාදරයට පාත්‍ර වී තිබේ.

මේ සම්බන්ධව පාසලේ විදුහල්පතිනිය  ඩබ්ලිව්. ජී. නිශාන්ති චන්ද්‍රිකා වත්තේගෙදර මහත්මිය මෙසේ සදහන් කළාය.

පදවිය "සී" යාය විදුහලේ අධ්‍යාපනය ලබන්නේ ගොඩාක්ම ආර්ථික අපහසුතා තිබුණද අධ්‍යාපනයට දැඩි උනන්දුවක් ඇති දරුවන් පිරිසක් ඉන්නවා. පාසල් නිවාඩු කාලය වුවද ප්‍රදේශයේ පෞද්ගලික උපකාරක පන්ති මුදලට පවත්වනවා. සමහර දරුවන්ට ඒවාට සහභාගි වෙන්න වත්කමක් නෑ. දරුවන් අසරණ වෙනවා.

ඒ නිසාම තමයි මමත් ගුරු මණ්ඩලයත් සාකච්ඡා කරලා මවුපිය අවසරය ද ලබාගෙන පාසලේ නොමිලේ පන්ති පවත්වාගෙන යන්නේ. දෙසැම්බර් 22 රජයේ නිවාඩු ලැබුණේ. දෙසැම්බර් 23 සිට 26 දක්වා නිවාඩු දින නිසා අපි දෙසැම්බර් 27 වැනිදා සිට පාසලේ පන්ති පවත්වාගෙන එනවා.