(චන්ද්‍රසේන ගමගේ)

මුහුදේ පාවෙමින් තිබූ බෝතලයක තිබූ ද්‍රාවණයක් පානය කිරීමෙන් රෝගාතුරුව සිටි  හා මිය ගිය තංගල්ලේ ධීවර පිරිස  හැකි ඉක්මණින් ගොඩබිමට රැගෙන එන ලෙසට බලකරමින්  ධීවරයින්ගේ ඥාතීන් හා අසල්වැසියන් පිරිසක් අද (29) සවස තංගල්ල මාතර ප්‍රධාන මාර්ගය පල්ලික්කුඩාව ප්‍රදේශයෙන් අවහිර කරමින් විරෝධතාවයක නිරත වූහ.

මෙම විරෝධතාවය පැයකට ආසන්න කාලයක් පැවති අතර විරෝධතාවය නිසා තංගල්ල මාතර ප්‍රධාන මාර්ගයේ ගමනාගමනය පල්ලික්කුඩාව ප්‍රදේශයෙන් සම්පූර්ණයෙන්ම අවහිර වූහ.

විරෝධතාකරුවන් පවසා සිටියේ මියගිය හා රෝගී වූ තම ඥාතීන් හැකි ඉක්මණින් ගොඩ බිමට ගෙන්වා දෙන ලෙසයි.

තමන් සිද්ධිය පිළිබඳව අද පෙරවරු 9 වන විට අදාල අංශ දැනුම්වත් කළද ඔවුන් කිසිදු පියවරක් ගෙන නොතිබුණු බවට ධීවරයින් ගේ ඥාතීන් චෝදනා කළහ.

විරෝධතාකරුවන් මාර්ගයෙන් ඉවත් කිරීම සදහා පොලීසිය උත්සාහ කළ අතර එහිදී විරෝධතාකරුවන් කළහකාරී ලෙස හැසිරිණි. අනතුරුව විරෝධතාකරුවන් හා සාකච්ඡා කිරීමෙන් අනතුරුව මාර්ගය විවෘත කිරීමට පොලීසියට හැකි වීය.

අද සවස වන විට ධීවරයින් සිවු තිදෙනෙකු මිය ගොස් තිබුණු බව පොලීසිය සනාථ කරනු ලැබීය.

මිය ගොස් ඇත්තේ තංගල්ල පල්ලික්කුඩාව ගොයම්බොක්ක හා අම්බලන්තොට යන ප්‍රදේශවල පදිංචි කරුවන් බව ට පොලීසියට තොරතුරු ලැබී තිබේ.