(පද්මසිරි ගාර්දියවසම්)

මුහුදේ පාවෙමින් තිබියදී හමුවූ විදෙස් මත්පැන් බෝතලයක් බව පවසා එය පානය කිරීමෙන් පසු මියගිය ධීවරයින්ගේ ගණන හතර දක්වා ඉහළ ගොස් ඇතැයි තංගල්ල මූලස්ථාන පොලිසිය පවසයි .

මෙම ධීවරයින් වෙනත් ධීවර යාත්‍රාවකින් ගොඩ බිමට රැගෙන එන බවද පොලිසිය කියයි .

අසාධ්‍ය තත්ත්වයේ පසුවන ධීවරයන් හැකි ඉක්මනින් ගොඩට රැගෙන ඒමට මැදිහත් වන ලෙසට බල කරමින් අද පස්වරුවේ මාතර කතරගම මාර්ගය තංගල්ල පල්ලික්කුඩාව ප්‍රදේශයෙන් හරස් කර ප්‍රදේශවාසීහු පිරිසක් උද්ඝෝෂණයකද නිරත වූහ .

නාවික හමුදාව ධීවරයන් ගොඩ බිමට රැගෙන ඒමට කටයුතු කරන බවට පොලිසිය පැවසූ පසු ධීවරයින් විසිර ගියහ .

----------------------------------

මුහුදේ පාවූ අරක්කු පානය කළ ධීවරයෙක් මරුට:තවත් පහකට අසාධ්‍යයි

----------------------------

(පද්මසිරි ගාර්දියවසම් සහ චන්ද්‍රසේන ගමගේ)

තංගල්ල ධීවර වරායෙන් ඉකුත් 4 වෙනිදා මුහුදු රැකියාවට ගිය බහුදින ධීවර යාත්‍රාවක් සිටි ධීවරයන් පිරිසක් මුහුදේ පාවෙමින් තිබියදී හමුවූ විදෙස් මත්පැන් බෝතලයක් පානය කිරීමෙන් පසු යාත්‍රාවේ ස්කිපර්වරයා ලෙස කටයුතු කල ධීවරයා ජීවිතක්ෂයට පත්ව ඇතැයි තංගල්ල මූලස්ථාන පොලිසිය පවසයි .

අනෙක් ධීවරයින් පස්දෙනාගේ තත්ත්වය අසාධ්‍ය බවද මේ වන විට වෙනත් ධීවර යාත්‍රාවකින් ඔවුන් ගොඩට රැගෙන එන බවද පොලිසිය පවසයි .

ධීවර යාත්‍රාව නාවික සැතපුම් 317 ක් දුර ගැඹුරු මුහුදේ යාත්‍රා කරමින් සිටියදී අද (29) දා මෙය සිදුවී තිබේ .

ජීවිතක්ෂයට පත්ව ඇත්තේ තංගල්ල උණාකූරුව ප්‍රදේශයේ පදිංචි එම්.ජේ.නයනකාන්ත නමැති 42 හැවිරිදි ධීවරයාය.

මේ වන විට නාවික හමුදා යාත්‍රාවක් මේ වන විට එම ස්ථානයට යවා ඇතැයි ද නාවික හමුදාව කියයි