(ෂේන් සෙනෙවිරත්න)

රට බංකොලොත් කළ රාජ්‍ය නිලධාරින් සහ දේශපාලකයන් නිදැල්ලේ සිටියදී ඒ බංකොලොත්භාවය නිසා තමන්ගෙ ජීවිත විනාශ වීම පිළිබඳව විරෝධය දක්වමින් පාරට බැස්ස ජනතාවට දඬුවම් කිරීම  අනුමත කළ නොහැකි බව පාර්ලිමේන්තු මන්ත්‍රී පාඨලී චම්පික රණවක මහතා මහනුවරදී පැවසීය.

ඒ මහතා ඒ බව අවධාරණය කර සිටියේ  මහනුවර ඩෙවෝන් හෝටලයේදී පැවති පාක්ෂික හමුවකින් අනතුරුව මාධ්‍ය හමුවේ අදහස් දක්වමිනි එහිදී ඒ මහතා වැඩිදුරටත් මෙසේ පැවසීය .

වත්මන් ආණ්ඩුවේ අභියෝගය වන්නේ ජනතාවගේ විශ්වාසය දිනා ගැනීමයි. ඒ සඳහා මර්දනය නතර කළ යුතුයි. යම් කෙනකු නීතිය ඉක්මවා කටයුතු කරනවා නම් එය වැළැක්වීම සඳහා කටයුතු කිරීම සම්බන්ධයෙන් විරුද්ධත්වයක් නැහැ. සැමට එක හා සමානව යුක්ති සහගතව නීතිය ක්‍රියාත්මක විය යුතුයි.

මේ රට අගාධයට ගෙන යාමට මුල් වූ රාජපක්ෂවරු නැවත වතාවක් දේශපාලන කරළියට ඇවිත් කටයුතු කරන අයුරු දැනගන්න දැකගන්න ලැබෙනවා. නැවත වතාවක් තමන්ගේ දූෂිත චර්යාවන් කරගෙන යෑමට ඔවුන් උත්සාහ කරමින් සිටිනවා .

ඉදිරියේදී ගොඩනැගීමට නියමිත බහුපාක්ෂික හෝ සර්වපාක්ෂික ආණ්ඩුව දූෂිතයන්ගෙන් හා රාජපක්ෂවරුන්ගෙන් තොරව ගොඩනැගීමේ වගකීම ජනාධිපතිවරයාට පැවරෙනවා. එසේ නොවුණහොත් ඒ පිළිබඳව මූලික විශ්වාසය බිඳ වැටිය හැකියි .

රටේ ජනතාව බලාපොරොත්තු වන්නේ දූෂණ චෝදනාවට ලක් වූ සහ රට බංකොලොත් කිරීමට මැදිහත් වූ දේශපාලනඥයන්ගෙන් නිදහස් වූ රටක් . එසේ නොවුණහොත් රජය මොන ආකාරයක මර්දනයක් ගෙන ගියත් ජනතාව අරගලයට යොමුවීමයි .