නිවේදිකාවක් ලෙස කලා ක්ෂේත්‍රයට එක්ව පසුව දක්ෂ රංගන ශිල්පිණියක් වූ දිල්හානි පෙරේරා මේ දිනවල සිය කලා කටයුතු වලින් ඇත්ව සිටින්නීය. ඒ ඇය මේ වනවිට මවක් වීමට සූදානමින් සිටිම හේතුවෙනි. මේ දිනවල සිය සැමියා සමගින් කොරියාවේ ගත කරන දිල්හානි සිය අලුත්ම තොරතුරු 'සාරවිට' අපිට මෙළෙස පැවසුවෙමු.

"මගේ පළමු දරුවා ලැබෙන්න ඉන්න නිසා මේ දිනවල මම නිර්මාණ කටයුතුවලින් ඈත්වෙලා ඉන්නේ. නමුත්, මා රංගනයෙන් දායක වුණ ටෙලි නාට්‍යය කිහිපයක්ම පසුගිය කාලයේ එක දිගට විකාශය වුණ හින්දත්, ඉදිරියේදී මා රඟපෑ තවත් ටෙලි නාට්‍යය කිහිපයක් විකාශය වෙන්න තියෙන නිසාත් මා කලා ක්ෂේත්‍රය තුළ නැති අඩුව එතරම් තදින් මගේ රසික, රසිකාවියන්ට දැනෙන එකක් නැහැ කියලා හිතනවා. දැනට මම රංගනයට පිවිසිලා දිගු කාලයක් වෙනවා. ඒ නිසා පෞද්ගලික ජීවිතෙ පැත්තත් කලා කටයුතු වගේම හිතන්න ඕනා කියලා හිතුණා. පුංචි අමුත්තා අපි අතරට එන්න දින තියෙන්නේ සැප්තැම්බර් මාසේ. පළමු වතාවට තමයි මාධ්‍යයකට මම මේ තොරතුරු දෙන්නේ. ඉතින් ඉදිරි කාලයේ මගේ පුංචි අමුත්තා වෙනුවෙන් වැඩි කාලයක් වෙන් කරන්න අවශ්‍යයි කියලා මට හිතෙනවා. නමුත්, කලාවෙන් දුරස් වෙන්න නම් මගේ අදහසක් නැහැ. ඉඩ ලැබෙන පරිදි ඉදිරියේදී කලාව පැත්තට මම සම්බන්ධ වේවි."

බුද්ධික සේනාධීර