(සුමිත් පොතුපිටිය ) කළුතර උතුර ප්‍රදේශයේ අද (31) අලුයම දුම්රියක් සහ ගුවන් හමුදාවට අයත් වෑන් රථයක් එකිනෙක ගැටී සිදුවූ අනතුරකින් ගුවන් හමුදා සෙබළකු මියගොස් තවත් සෙබළකු තුවාල ලබා ඇතැයි කළුතර උතුර පොලිසිය පවසයි . අනතුරෙන් මියගොස් ඇත්තේ වීරවිල ගුවන් හමුදා කදවුරේ රාජකාරි නියුතු වැල්ලවාය ප්‍රදේශයේ පදිංචි සෙබළකු බවත් , බුත්තල ප්‍රදේශයේ පදිංචි සෙබළකු තුවාල ලබා ඇති බවත් පොලිසිය කීය. අලුයම 1.33 ට පමණ දුම්රිය කළුතර දෙස සිට කොළඹ දෙසට ගමන් කර ඇති අතර , වෑන් රථය මුහුදු වෙරළ දෙස සිට ගාලුපාර දෙසට දුම්රිය හරස්මග හරහා යොමු කිරීමේදී අනතුර සිදුව ඇතැයි පොලිසිය කියයි . තුවාල ලැබූ සෙබළුන් දෙදෙනා කළුතර ශීක්ෂණ රෝහලට ඇතුලත් කර ඇති අතර , එහිදී එක් සෙබළකු මියගොස් ඇතැයි පොලිසිය සදහන් කරයි.