(යොහාන් භාසුර)

දුම්රිය දෙපාර්තමේන්තුව ඉදිරියේදී ධාවනයට යෙදවීමට නියමිත රාත්‍රී තැපැල් දුම්රියවල පළමු පන්තියේ නිදන මැදිරිය නොමැති බවට දුම්රිය දෙපාර්තමේන්තු ආරංචි මාර්ග සඳහන් කරයි.

දුම්රිය ස්ථානාධිපති සංගමයේ නිලධාරියකුගෙන් මේ පිළිබඳව කළ විමසුමේදී පැවසුවේ දුම්රිය දෙපාර්තමේන්තුව වසර ගණනාවක් සිට ජනතාවට සපයන නිදන මැදිරි පහසුකම අහිමිකිරීම අනුමතකළ නොහැකි බවත් නව තැපැල් දුම්රියවල තැපැල් දෙපාර්තමේන්තුව සකස් කළ තැපැල් කාර්යාලයක් වැනි ‘තැපැල් මැදිරිය’ නොමැති බවත්ය.

තැපැල් දුම්රියවල පළමු පංතියේ නිදන කාමර සහ දෙවැනි පංතියේ නිදන මැදිරි මේ දක්වා පැවැති බවත් එම මැදිරිවලින් විශාල විදේශ විනිමයක් ඉපයූ බවත් එම සංගමය කියයි.

දුම්රිය දෙපාර්තමේන්තුව මීට මාස හයකට පමණ පෙර ඉන්දියාවෙන් මැදිරියක් කෝටි එකහමාරක් පමණ වන මැදිරි 160 ඇනවුම් කර ඉන් 120 ක් පමණ මේ වන විට ශ්‍රී ලංකාවට ගෙවිත් තිබුණ ද ධාවනයට එකතු කර නොමැති බව කී එම දුම්රිය ස්ථානාධිපති සංගමයේ නිලධාරියා පැවසුවේ එම මැදිරි මාස කීපයකට සිට මාලිගාවත්ත ඇතුළු දුම්රිය අංගනවල ගාල්කර තිබෙන බවත්ය.

එම දුම්රිය මැදිරි පරීක්‍ෂණ ධාවනයන් ද සම්පූර්ණ කර තිබුණත් මේ දක්වා ධාවනයට එක්කර නොමැති බවට ඔහු වැඩි දුරටත් කීය.