(චන්ද්‍රසේන ගමගේ සහ පද්මසිරි ගාර්දියවසම්)
 
‘ජාතික සම්පත් සුරකිමු-දේශාපාලන දඩයම නවතනු‘ මැයෙන් හෙට (15) තංගල්ල නගර ශාලාවේදී පැවැත්වීමට නියමිත සම්මන්ත්‍රණයෙන් අනතුරුව තංගල්ල නගරයේ පැවැත්වීමට සූදානම් කර තිබූ නිහඬ විරෝධතාවට තංගල්ල මහේස්ත්‍රාත් මහී ඩිරේරත්න මහතා නියෝග කිහිපයක් පැනවීය.

තංගල්ල මූලස්ථාන පොලීසියේ ස්ථානාධිපති ප්‍රධාන පොලිස් පරීක්ෂක ලලිත් හෙට්ටිආරච්චි මහතා තංගල්ල අධිකරණයෙන් කළ ඉල්ලිමකට අනුව මෙම නියෝග නිකුත් කර ඇත්තේ දකුණු පළාත් සභා මන්ත්‍රීවරුන් වන ඩී.වී උපුල් හ අජිත් රාජපක්ෂ යන අයටයි.

විරෝධතාව අතරතුරදී තංගල්ල මහවෙල මාර්ගය ,බෙලිඅත්ත මාර්ගය හා කතරගම මාර්ගය අවහිරවන සේ විරෝධතාවය දැක්වීම හා මහජනයාට පීඩා සිදුවන ආකාරයට විරෝධතාවයේ යෙදීම තහනම් කරමින් මෙම නියෝග පනවා ඇත.

එම නියෝගය ඩී.වී උපුල් මහතාගේ නිවසටද අජිත් රාජපක්ෂ මහතාගේ නිවසටද බාර දුන් බව තංගල්ල පොලීසිය පවසයි.

තංගල්ල නගරශාලාවේ පැවැත්වෙන සම්මන්ත්‍රණය සදහා ඒකාබද්ධ විපක්ෂයේ ඩලස් අලහප්පෙරුම, විමල් වීරවංශ ,ජොන්ස්ටන් ප්‍රනාන්දු සහ රෝහිත අබේගුණවර්ධන පාර්ලිමෙන්තු මන්ත්‍රීවරුන් සහභාගි වීමට නියමිතය.