(යොහාන් භාසුර)

ශ්‍රී ලංකා මුහුදු සීමාවට සති දෙකකට පෙර ළගාවූ ගෑස් නෞකා දෙක නිදහස් කරගැනීමට ඩොලර් නොමැති වීමෙන් රට තුළ දැඩි ගෑස් හිඟයක් ඇතිවීමේ අවදානමක් පවතින බව ලිට්‍රෝ සමාගමේ නිලධාරියෙක් අද (14) පස්වරුවේ ‘ලංකාදීප’යට පැවසීය.

එම ගෑස් නෞකා ඊයේ පස්වරුව වන විටත් නිදහස් කරගැනීමට නොහැකි වූ බව කී එම නිලධාරියා මීට පෙර නිදහස් කරගත් නෞකාවේ ගෑස් තොගය අවසන් වෙමින් තිබෙන බව ද සඳහන් කළේය.

එක නෞකාවක් හෝ නිදහස් කරගත හොත් අඛණ්ඩව සැපයුම පවත්වාගෙන යා හැකි බවත් එසේ නොවුණ හොත් අර්බුදයකට මුහුණදීමට සිදුවන බවත් එම නිලධාරියා කීය.

මෙම නෞකා දෙක නිදහස් කරගැනීමට බලධාරීන් සමඟ අඛණ්ඩව සාකච්ඡා කරමින් සිටින බව කී එම නිලධාරියා සඳහන් කළේ නෞකාවක් හෝ අද රාත්‍රී නිදහස් කරගැනීමට හැකිවනු ඇති බවට විශ්වාස කරන බවත්ය.

රට පුරාම ඊයේ දිනයේ ද දිගු ගෑස් පෝලිම් දැකිය හැකි වූ අතර එම කිසිඳු අළෙවිසලකට ප්‍රමාණවත් ගෑස් සිලින්ඩර ප්‍රමාණයක් ලැබී නොලැබීමෙන් පෝලිම්වල පැය ගණන් ගතකර ඇතැමුන්ට ගෑස් නොමැතිව යෑමට සිදුවිය.