ඩෙන්මාර්කයේ 19 හැවිරිදි ඉසබෙලා කුමරිය, මාස 11 ක පූර්ණ හමුදා සේවය සඳහා එක්වූවාය. ඒ අනුව, ඩෙන්මාර්ක රජ පවුලෙන්, පූර්ණ හමුදා පුහුණුවකට එක්වූ පළමු කාන්තාව ඉසබෙලා කුමරියයි.

කුමරිය පසුගිය දා ස්ලැගල්ස් හි පිහිටි ඇන්ට්වෝර්ස්කොව් හමුදා කඳවුරට වාර්තා කළ අතර, මෙය ඩෙන්මාර්ක රාජකීය ඉතිහාසයේ සන්ධිස්ථානයක් ලෙස ද සැලකෙයි.

ඉසබෙලා කුමරිය, ඩෙන්මාර්කයේ, 10 වැනි ෆෙඩ්රික් රජුගේ සහ මේරි රැජිනගේ වැඩිමහල් දියණියයි. ඇය හමුදා පුහුණුව සඳහා මෙසේ එක් වූයේ උසස් පෙළ අධ්‍යාපන කටයුතු අවසන් කර සති කීපයකිනි.

ඇන්ට්වෝර්ස්කොව් හමුදා කඳවුර වෙත පැමිණි කුමරිය, සිය හැඳුනුම්පත පෙන්වා, කඳවුරට ඇතුළු වන අයුරු දැක ගැනීමට මාධ්‍යවේදීහු පිරිසක් ද පැමිණ සිටියහ. ඉසබෙලා කුමරියගේ වැඩිමහල් සොයුරු, ඔටුන්න හිමි ක්‍රිස්ටියන් කුමරු ද මෙම හමුදා කඳවුරෙන්ම පුහුණුව ලබා දෙවන ලුතිනන්වරයකු ලෙස රාජකාරි කරමින් සිටී.

ඩෙන්මාර්කයේ සාමාන්‍යයෙන් හමුදා සේවයේ නිරත වන ආධුනිකයන්ට මාසික වේතනයක් සහ දෛනික දීමනාවක් හිමි වුවද, ඉසබෙලා කුමරිය එම කිසිදු මූල්‍ය ප්‍රතිලාභයක් ලබා නොගැනීමට තීරණය කර ඇතැයි ද පැවැසෙයි. ඩෙන්මාර්ක රාජකීය පවුල තහවුරු කර ඇත්තේ ඇය මෙම පුහුණු කාල සීමාව තුළ සිය මාපියන්ගේ මූල්‍ය ප්‍රතිපාදන මත යැපෙන බවය.

යුක්රේන යුද්ධය සහ ආක්ටික් කලාපයේ පවතින ආරක්ෂක තර්ජන සැලකිල්ලට ගනිමින් ඩෙන්මාර්කය සිය හමුදා බලය ශක්තිමත් කිරීමට පියවර ගෙන ඇත. ඒ අනුව, 2024 වසරේ සිට කාන්තාවන් සඳහා ද හමුදා සේවය අනිවාර්ය කළ අතර, පුහුණු කාල සීමාව මාස 4 සිට මාස 11 දක්වා දීර්ඝ කර ඇත. මෙවර තරුණ තරුණියන් 1,600 ක් පමණ මෙම දීර්ඝ කරන ලද හමුදා පුහුණුව සඳහා එක්ව සිටින බව ද පැවැසෙයි.

බ්‍රිතාන්‍ය රජ පවුල මෙන් නොවුණත් ලෝකයේ පැරණිතම සහ ජනප්‍රිය රජපවුලක් ලෙස ඩෙන්මාර්ක රජ පවුල හැඳින්විය හැකිය. ඩෙන්මාර්ක රාජකීයයන්, නූතන ප්‍රජාතන්ත්‍රවාදී රාජ්‍යයකට ගැළපෙන පරිදි ඉතා සරල හා ජනතාවට සමීප පාලන රටාවක් පවත්වාගෙන යයි. 10 වැනි ෆෙඩ්රික් ඩෙන්මාර්ක රජු බවට පත්වූයේ, වසර 52ක දීර්ඝ පාලන සමයකින් පසු 2024 වසරේ දී ඔහුගේ මව දෙවැනි මාග්‍රෙත් රැජින කිරුළ අත්හැර එය පුතුට බාර දීමෙනි.