(සුජිත් හේවාජුලිගේ සහ යොහාන් භාසුර)

ජල ගාස්තු ලබන සැප්තැම්බර් 1 වැනිදා සිට ඉහළ නැංවීමට තීරණය ඇතැයි ජාතික ජල සම්පාදන හා ජලාපවහන මණ්ඩලයේ උසස් නිලධාරියකු පැවසීය.

ඒ අනුව ජල ගාස්තුව සියයට 70 ත් 90 ත් අතර ප්‍රතිශතයකින් ඉහළ දැමීමට නියමිත බවත් සේවා ගාස්තුව වැඩි ප්‍රතිශතයකින් ඉහළ දැමීමට නියමිත බවත් එම නිලධාරියා සඳහන් කළේය.

ජල ගාස්තු ඉහළ දැමීම ජනතාවට බරක් නොවන ආකරයට ක්‍රියාත්මක කිරීමට උපරිමයෙන් කටයුතු කළ බවත් එහිදී අඩු ආදායම් ලාභීන් පිළිබඳව ද අවධානය යොමු කළ බවත් එම නිලධාරියා කීය.  

ජල ගාස්තුව අගෝස්තු මස 15 වැනිදා සිට ඉහළ දැමීමට කැබිනට් මණ්ඩලයේ අනුමැතිය ලැබුණ ද එය සැප්තැම්බර් මස 15 වැනිදා සිට ක්‍රියාත්මක කිරීමට තීරණය කර ඇති බව කී එම නිලධාරියා සැප්තැම්බර් මස 1 වැනිදා සිට ගාස්තුව ඉහළ දැමීම ක්‍රියාත්මක කළ හොත් අගෝස්තු මස පාවිච්චි කළ ජලය සඳහා ද වැඩි වූ ගාස්තු අයකිරීමට සිදුවන නිසා 15 වැනිදා සිට ක්‍රියාත්මක කරන බව ද සඳහන් කළේය.

ජල සම්පාදන සේවා ගාස්තුව ජල පරිභෝජන ඒකක සංඛ්‍යාව අනුව තීරණය වන අතර සේවා ගාස්තුව මීට පෙර රුපියල් 50 සිට රුපියල් 1600 ක් දක්වා පැවතුණි.

ජල ගාස්තු ඉහළ දැමීමට අදාල ගැසට් නිවේදනයට ජල ස්මපාදන අමාත්‍ය කෙහෙළිය රඹුක්වැල්ල මහතා අත්සන් තබා ඇති අතර එම නිවේදනය අද (26) රාත්‍රී නිකුත් කිරීමට නියමිතව තිබුණි.