ඒකාබද්ධ විපක්ෂය යන වචනය මාධ්‍ය නිදහස අවභාවිත කිරීමක් යැයි පාර්ලිමේන්තු ප්‍රතිසංස්කරණ හා ජනමාධ්‍ය අමාත්‍යාංශයේ ලේකම්වරයා මාධ්‍ය ආයතන වෙත යැවූ නිවේදනය රජයේ ස්ථාවරය නොවන බවත් එය ලේකම්වරයාගේ පෞද්ගලික කාරුණික ඉල්ලීමක් බවත් පාර්ලිමේන්තු ප්‍රතිසංස්කරණ හා ජනමාධ්‍ය අමාත්‍ය ගයන්ත කරුණාතිලක මහතා   පැවැසීය.

එම කාරුණික ඉල්ලීම සහිත ලිපිය මාධ්‍ය නිවේදනයක් ලෙස පිළිගත යුතු නැති බව සඳහන් කළ   කරුණාතිලක මහතා මාධ්‍ය නිවේදනයක් නම් ප්‍රවෘත්ති දෙපාර්තමේන්තුව හරහා එය මාධ්‍ය ආයතන වෙත යොමු කරන බව ද මෙම ලිපිය යැවීමේදී එවැනි ක්‍රමවේදයක් අනුගමනය කර නැති බව පෙනී යන්නේ යැයි ද පැවැසීය.

මෙම ලිපිය නිකුත් කරන විට තමන් කොළඹින් බැහැරව සිටි හෙයින් එය නොදුටු බව පැවැසූ කරුණාතිලක මහතා තමා දුරකතනය මඟින් ලිපිය කියවා අසා ගැනීමේදී එහි කිසිදු තර්ජනාත්මක ස්වරූපයක් නැති ඉතා කාරුණික ඉල්ලීමක් පමණක් ඇති බව තේරුම් ගිය බව ද සඳහන් කළේය. ජනපති, අගමැති තමා ඇතුළු යහපාලන රජය හැමවිටම මාධ්‍ය නිදහස සුරක්ෂිත කිරීම වෙනුවෙන් කැපවී ක්‍රියා කරන බව සඳහන් කළ අමාත්‍යවරයා විපක්ෂය පටු වාසි ලබා ගැනීමේ අරමුණින් විවිධ අර්ථකතන ලබා දුන්න ද රජය කිසිවිටකත් මාධ්‍යය නිදහස සීමා කරන්නට කටයුතු නොකරන බව අවධාරණය කළේය.