රුහුණු කතරගම මහා දේවාලයේ බස්නායක නිළමේ තෝරාපත් කර ගැනීමේ ක්‍රමය වෙනස් කිරීමට රජය අදහස් කරයි. අද (22) අලුයම කතරගම ගිය මෛත්‍රිපාල සිරිසේන ජනපතිට, රනිල් වික්‍රමසිංහ අගමැතිට හා බුද්ධ ශාසන ඇමැති කරු ජයසූරියට රුහුණු මාගම්පත්තුවේ ප‍්‍රධාන අධිකරණ සංඝනායක කපුගම සරණතිස්ස හිමියන් පැවසූවේ විහාර දේවාලගම් ආඥාපනත සංශෝධනය කර දේශපාලනයෙන් තොර ස්වාධීන පුද්ගලයකු බස්නායක නිළමේ තනතුරට පත් කිරීමට ක්‍රියා කළ යුතු බවයි.

බස්නායක නිළමේ පත් කරගැනීම සඳහා දැනට ඡන්දය හිමි 17 දෙනා වෙනුවට ඌව පළාතේ සියලු විහාරස්ථාන වෙත ඡන්ද අයිතිය ලබා දුන්නොත් දැනට පවතින ප්‍රශ්න රැසකට විසඳුම් ලැබෙන බව සරණතිස්ස හිමියෝ කීහ.

කතරගම බස්නායක නිළමේ පත් කිරීම සඳහා දැනට ඡන්ද බලය හිමිවී ඇත්තේ ඌවේ ප්‍රාදේශිය ලේකම්වරු 11 දෙනාටත්, කතරගම පන්සල් 4කටත් (කිරිවෙහෙර, අභිනවාරාමය, වැඩිහිටිකන්ද හා මහසෙන්), වැඩබලන බස්නායක නිළමේටත් හා බිබිල කොටබෝව දේවාලයටත්ය.

බුද්ධ ශාසන ඇමැති කරු ජයසූරිය මහතා පැවසූයේ එම යෝජනාව ඉදිරි සංශෝධනයකදී සලකා බලන බවයි. කිරි වෙහෙර රජමහා විහාරාධිපති කොබවක ධම්මින්ද, වැඩිහිටිකන්ද විහාරාධිපති කිරින්දේ ඥානානන්ද, වැඩබලන බස්නායක නිළමේ යසසිරි කස්තුරිආරච්චි හා පළාත් සභා මන්ත්‍රී දයා ගමගේ මහත්වරුද මේ සාකච්ඡාවට එක්වූහ.

ජනපති හා අගමැති අද අලුයම කතරගම කිරිවෙහෙර හා මහ දෙවොලේ ආගමික වැඩසටහන්වලට ගියේය.