ඉඩම් අක්කර 15,000ක් ආයෝජන සඳහා චීනයට බදු දීමට තීරණය කළේ පසුගිය ආණ්ඩු කාලයේ බවත්, හිටපු ජනපති මහින්ද රාජපක්ෂ මහතා දැන් විරුද්ධ වෙන්නේ වෙනත් හේතූන් මත බවත් කැබිනට් සම ප්‍රකාශක සෞඛ්‍ය ඇමැති රාජිත සේනාරත්න මහතා පැවසීය.

ප්‍රවෘත්ති දෙපාර්තමේන්තුවේ පැවැති කැබිනට් තීරණ දැනුම් දීමේ මාධ්‍ය සාකච්ඡාවට අද එක්වෙමින් සේනාරත්න මහතා කීවේ මේ ආණ්ඩුව තවත් වසරක් බලයේ සිටියහොත් ඔහුගේ පවුලේ උදවියට හිරේ යන්නට සිදුවන බව දන්නා නිසා දැන් ආණ්ඩුවේ තීරණවලට හිටපු ජනපතිවරයා විරුද්ධ වන බවයි.

හම්බන්තොට ඉඩම් අක්කර 15,000ක් චීනයට බදු දීමට යතියි කියන කාරණය ගැන මාධ්‍යවේදියකු නැඟූ ප්‍රශ්නයකට පිළිතුරු දෙමින් ඔහු එසේ කීවේය.

අතීතයේ පාර්ලිමේන්තුවට බෝම්බ ගැසූ උදවිය අද පාර්ලිමේන්තුවට පැමිණ සිටින බවත්, නෑ, බෑ සහ එපා යන වචන ජනතා විමුක්ති පෙරමුණේ ත්‍රිවිද රත්නය බවත් රාජිත සේනාරත්න මහතා සඳහන් කළේය.

ප්‍රශ්නය - මේ ආණ්ඩුව අක්කර පහළොස් දහසක් චීනයට දීමට යන බව කියනවා. ඒ ගැන මොකද කියන්නේ?

පිළිතුර - අපි මේවා කළින් කිව්වේ. මහින්ද රාජපක්ෂ රජය සමයේ දකුණු සහ ඌව පළාත් මැතිවරණවලදි මමත් මේ ගැන කිව්වා. හම්බන්තොට වරාය සහ ගුවන්තොටුපොළ සුදු අලින් වගේ. මේවයින් ප්‍රයෝජන ගත්තේ නැතත් විශාල මුදලක් අපි ගෙවන්න ඕනෑ. මේවයෙන් ප්‍රයෝජන ගන්න ඒ අවට අයෝජන  කරන්න වෙනවා. චීනයට ඉඩම් විකුණන්නේ නෑ. ඉඩම් බදු දෙනවා පමණයි. එමගින් රැකියා අවස්ථා රැසක් ඇති වෙනවා.

ප්‍රශ්නය - තමන්ගේ ඉඩම් අහිමිවෙනවාට ප්‍රදේශවාසීන් විරුද්ධයි. විරෝධතා මැදද මේ දේ කරන්නේ?

පිළිතුර - විරෝධතා කරන්න පුළුවන්. ඒ කාලේ වගේ වෙඩි තියන්නේ නැහැනේ. නොරොච්චෝලේ විදුලිබලාගාය යූඇන්පී ආණ්ඩුවෙන් යෝජනා කරද්දී හිටපු ජනපතිත් ඊට විරුද්ධ වුණා. අන්තිමට ප්‍රදේශවාසීන් විරෝධතා පවත්වද්දී හිටපු ජනපතිම ගිහින් මුල් ගල තිබ්බා. ඒක තමයි හරිම ක්‍රමය. එදා මුල් ගල නොතිබ්බා නම් අද බලාගායක් නෑ. 13 වැනි ආණ්ඩුක්‍රම ව්‍යවස්ථා සංශෝධනය ගේද්දි මොකද කිව්වේ? ඊලමක් කියලයි කිව්වේ. 13ට විරුද්ධ වුණු අය අන්තිමට පළාත් සභාවලටත් ආවා. පළාත් සභා බලය වැඩි කරන්න ප්‍රඥප්තිත් සම්මත කර ගත්තා.  

ප්‍රශ්නය - ඉඩම් ලබා දීම ගැන ආණ්ඩුවේ පාර්ශ්ව වල විවිද මත තිබෙනවා. එජාප ඇමැතිවරුන් හා ශ්‍රීලංකා ඇමැතිවරුන් එකිනෙකාට චෝදනා කර ගන්නවා. මේ ආණ්ඩුව දැන් හෙල්ලෙනවා වගේ නේද?

පිළිතුර - හෙල්ලුනාට වැටෙන්නේ නැහැනේ. හෙල්ලෙන හැම දෙයක්ම වැටෙන්නේ නෑ.