යුද ගැටුම් වලින් පසු යළි ගොඩනැගීම පිළිබඳ චෙච්නියාවේ අත්දැකීම් ශ්‍රී ලංකාවට ලබාදීමට  රුසියාව මෙරට රජයට ආරාධනා කර ඇතැයි තානාපති ආරංචි පවසයි.

මෙරට ප්‍රතිසන්ධාන කටයුතු සඳහා චෙච්නියාවෙන් බොහෝ පාඩම් ලබා ගත හැකි බවත් එබැවින් ඒ සම්බන්ධයෙන් සොයා බලා එහි අත්දැකීම් ලබා ගන්නා ලෙසට ශ්‍රී ලංකාවේ රුසියානු තානාපති ඇලෙක්සැන්ඩර් කර්චාවා හිටපු ජනාධිපතිනී චන්ද්‍රිකා කුමාරතුංගට යෝජනා කර ඇතැයි එම ආරංචි මාර්ග සඳහන් කරයි.

ප්‍රතිසන්ධාන සඳහා වන කාර්ය සාධක බලකායේ ප්‍රධානියා හිටපු ජනාධිපතිනිය වන අතර රුසියානු තානාපතිවරයා ඇයට දන්වා ඇත්තේ ශ්‍රී ලංකාව ඒ සම්බන්ධයෙන් කැමැත්තක් පළ කරන්නේ නම් මෙරට බලධාරීන් කණ්ඩායමකට චෙච්නියාවේ සංචාරයක් සැලසුම් කිරීමට හැකි බවයි.

රුසියානු පාලනයෙන් මිදී වෙනම රාජ්‍යයක් ඉල්ලමින් චෙච්නියා ගරිල්ලන් ඉකුත් දශක කිහිපයේදී රුසියාව සමඟ යුද වැදුණු අතර  මේවන විට චෙච්නියාව පාලනය කරනු ලබන්නේ රුසියාවේ මැදිහත් වීමෙන් පිහිටවූ රජයක් විසිනි.