(ක්‍රිෂාන් ජීවක ජයරුක්)

මාතර රාහුල විද්‍යාලයීය අවතැන් කඳවුරට ලැබුණු පානීය ජල බෝතල් තොගයක් සොරකම් කළ බව කියන සිද්ධියක් සම්බන්ධයෙන් එම කඳවුර භාරව සිටි ග්‍රාම නිලධාරීන් දෙදෙනකු ගැන පරික්ෂණයක් පවත්වන බව මාතර මූලස්ථාන පොලීසිය පවසයි.
සිය යතුරුපැදිවල ගැට ගසා ගෙන ජල බෝතල් විස්සක් රැගෙන යන අවස්ථාවේ දී අවතැන්වුවන් විසින් මග රැක සිට එම ග්‍රාම නිලධාරීන් දෙදෙනා අල්ලා පහර දී පොලීසියට භාර දෙනු ලැබ ඇත.
අදාල අවතැන් කඳවුරේ සිටි පිරිසට රාත්‍රි 12.00 න් පසු පන්ති කාමර වලින් පිටතට පැමිණීම හා තැනින් තැන රැඳී සිටීම තහනම් කර තිබු බව ද කියති.
කෙසේ වෙතත් මේ පිළිබඳව දෙපාර්ශවයෙන්ම පැමිණිලි ලැබී ඇති නිසා නිසි විමර්ශනයක් සිදු කර ඉදිරි නීතිමය ක්‍රියා මාර්ග ගන්නා බව පොලිසිය සඳහන් කරයි.
මේ අතර රාහුල විද්‍යාලයේ අවතැන් කඳවුරට ලැබී තිබු ආධාර තොගයක් එහි පන්ති කාමරවල ගබඩා කර තිබියදී ඒවායෙහි දොරවල් වල අගුළු කඩා එම සියලු ආධාර අවතැන්වුවන්ට බෙදා දීමට ඉරිදා(4) මාතර දිස්ත්‍රික් ලේකම් කාර්යාලයේ නිලධාරීහු පිරිසක් කටයුතු කළහ.