(සුරංග රාජනායක)

“බාප්පලාගෙ ගෙදර හිටිය පොඩි අක්කා අපේ ගෙදරට ගෙන ආවට පස්සෙ එයාට හිටගෙනවත් ඉන්න බැරි තරමට අමාරුවෙන් හිටියේ.කීප සැරයක් එයාට වමනේ ගියා. විකාර දෙඩෙව්වා. නින්ද ගියේ නෑ.තාත්තා රෑ 2ට විතර නැගිටලා පොඩි අක්කට බැන්නා අපට නිදාගන්නවත් නෑ කෙඳිරිගානවා කියලා. එහෙම කියලා තාත්තා පොඩි අක්කට ලීයකින් දෙකක් ගහලා ගෙයින් එළියට දැම්මා. මමයි අම්මයි ලොකු අක්කයි නංගියි සේරම පොඩි අක්කා එක්ක මහ රෑ එළියට ගියා” යැයි පියාගේ හා බාප්පාගේ පහරදීමකින් පසුව මියගියා යැයි සැකකරන 14 හැවිරිදි නිපුනි නුවන්තිකා බණ්ඩාර දැරියගේ මූලික මහේස්ත්‍රාත් පරීක්ෂණයේදී ඇගේ නැඟණිය වන දොළොස් හැවිරිදි පවනි නෙත්මිණි බණ්ඩාර දියණිය සාක්කි දෙමින් පැවැසුවාය.

ගම්පොළ මහේස්ත්‍රාත් සහ දිසාවිනිසුරු ශ්‍රීනිත් විජේසේකර මහතා විසින් මියගිය නුවන්තිකා බණ්ඩාර දැරියගේ නිවසට ගොස් මහේස්ත්‍රාත් පරීක්ෂණය පැවැත්විය.

ගම්පොළ මවුන් ටෙන්පල් ජනපදයේ පදිංචි නුවන්තිකා දැරිය ගම්පොල ශාන්ත ජෝසප් බාලිකා මහා විද්‍යාලයේ 9 වසර පන්තියේ ඉගෙනුම ලබමින් සිටියාය.

ගම්පොළ අංගම්මන පිහිටි බාප්පාගේ නිවෙස වෙත ගොස් ඇති නුවන්තිකා මෙම 19 වැනිදා යළි නිවසට රැගෙන එනු ලැබ සිටියාය.

බාප්පාගේ නිවසට ගොස් සිටියදී බාප්පාගේ දියණිය හා නුවන්තිකා එම ප්‍රදේශයේ තරුණයකු සමග පේර කැඩීමට ගොස් සිටියදී එය දැක ඇති යම් කෙනකු ඒ බව බාප්පාට දැන්වීමෙන් පසු ඔහු දැරියන් දෙදෙනාම කැඳවා අවවාද කර පහරදී ඇති බව හෙළිවී තිබුණි.

මෙම පහරදීමෙන් පසු නිවෙසට ගෙනා නුවන්තිකා අසනීපව අසාධ්‍ය තත්ත්වයෙන් පසු වුවද කිසිවකුත් ඇය රෝහල්ගත කිරීමට හෝ පියවර ගෙන නොතිබූ අතර යළිත් ඇයට පියාද පහරදීම නිසා 21 දින උදෑසන වන විට ඇය දැඩි ලෙස අසාධ්‍ය තත්ත්වයට පත්ව සිට ඇතැයි පොලිස් පරීක්ෂණවලදී අනාවරණය වී තිබිණි.

එහිදී ඇගේ නිවස අසල ඥාතී නිවසකට ඇය රැගෙන ගිය පසු එම ඥාතීන් ඇය රෝහල් ගත කිරීමට සූදානම් වුවත් පියා එයටද ඉඩ ලබාදී නොමැති බව මෙහිදී අනාවරණය විය.

තවදුරටත් මූලික සාක්ෂි දෙමින් පවනි බණ්ඩාර දැරිය මෙසේ කීවාය.

පොඩි අක්කා උඩහ අයියලගෙ ගෙදරට අරන් ගියාට පස්සේ අම්ම ගමේ නැන්දා කෙනකුට කියලා දෙහි ගෙඩියක් මතුරලා ගෙනත් දෙන්න ඕනෑ කිව්වා.

මෙහිදී අසල්වැසි ඥාති කාන්තාවක වන රහදිය වෙද රාලලාගේ තිළිණි මනිෂා මහත්මිය මහේස්ත්‍රාත් පරීක්ෂණයේදී මෙසේ පැවැසුවාය.

නුවන්තිකා මගේ සැමියාගේ ලොකු අම්මගෙ දුව. එයාට අංගම්මන බාප්පලගෙ ගෙදර දී පහරදීලා කියන ආරංචියට මගේ මහත්තයයි අනෙක් අයයි ත්‍රීවිල් එක අරන් ගිහින් නංගි ගෙදර ගෙනාවා. එයා දවස් දෙකක් කාලා තිබුණේ නෑ විකාර දෙඩෙව්වා. කියන ඒවා පැහැදිලිව ඇහුණේ නෑ උගුරෙන් තමයි ශබ්දය පිට වුණේ.

එයා මට කීවා මම මහණ වෙන්න යනවා ඔයත් එනවද මගෙත් එක්ක යන්න කියලා. පස්සේ දවල් එක හමාරට විතර එයා වතුර ඉල්ලු‍වා. මහත්තයා එයාට යෝගට් ටිකක් කැව්වා. අයිස් වගේකුත් දුන්නා. දවල් දෙකට විතර ඇඳේ හිටිය එයා එකවරම ගල් වුණා, හුස්ම ගත්තෙ නෑ.

මෙහිදී මහේස්ත්‍රාත්වරයා වැඩිදුර සාක්ෂි විභාගය ලබන 29 වැනිදා කල් තැබිණ.

එදිනට සාක්ෂිකරුවන් අධිකරණය වෙත ඉදිරිපත් කරන ලෙස පොලිසියට නියෝග කළේය.

ගම්පොළ මූලස්ථාන පොලිසියේ ස්ථානාධිපති ප්‍රධාන පොලිස් පරීක්ෂක ලක්සිරි ප්‍රනාන්දු මහතාගේ උපදෙස් මත අපරාධ අංශයේ ස්ථානාධිපති ප්‍රධාන පොලිස් පරීක්ෂක කපිල බණ්ඩාර, උපපොලිස් පරීක්ෂක අසංක යන නිලධාරීන් එහිදී සාක්ෂි මෙහෙයවීම හා සටහන් කිරීම සිදු කළහ.

මෙහිදී මහේස්ත්‍රාත්වරයා ප්‍රකාශ කර සිටියේ මෙම දැරිය කල් වේලා ඇතිව රෝහල්ගත කළා නම් ඇය බේරා ගැනීමට තිබූ බවය. මවුපියන් හා ඥාතීන් ප්‍රාථමික අයුරින් කටයුතු කිරීම නිසා අඩු වයස් දරුවකු මෙසේ මිය යෑම කනගාටුදායක තත්ත්වයක් බවද සඳහන් කළේය.