තමන්ට මෙරට පුරවැසිභාවය ලබාදෙන ලෙස ඉල්ලා ඉදිරිපත් කර ඇති අයැදුම්පත සළකා බලා තමන්ට පුරවැසිභාවය ප‍්‍රදානය කිරීමට නියෝග කරමින් රිට් ආඥාවක් නිකුත් කරන ලෙස ඉල්ලා පෙරටුගාමී සමාජවාදී පක්ෂයේ මධ්‍යම කාරක සභික කුමාර් ගුණරත්නම් පෙත්සමින් කර ඇති ඉල්ලීම සම්බන්ධයෙන් නීතිපතිවරයාගේ ස්ථාවරය ලබන 06 වැනි දා අධිකරණයට දැනුම් දෙන ලෙස අභියාචනාධිකරණය අද (25) නියෝග කළේය.

පෙත්සම තවදුරටත් පවත්වාගෙන යනවාද නැද්ද යන්න එදිනට සළකා බැලීමට අභියාචනාධිකරණය විසින් තීන්දු කරන ලදී.

පෙත්සම අභියාචනාධිකරණ සභාපති විනිසුරු විජිත් මළල්ගොඩ මහතා සහ අභියාචනාධිකරණ විනිසුරු ප‍්‍රීති පද්මන් සූරසේන හමුවේ අද (25) කැඳවූ අතර එහිදී මෙම නියෝග ලබා දෙන ලදී.