(යොහාන් භාසුර)

ශ්‍රී ලංකාවට විදේශ විනිමය උපයාගත හැකි ඖෂධීය ශාඛයක් ලෙස ‘කංසා’ හදුන්වන බවත් ශ්‍රී ලංකාව තුළ ‘කංසා’ ඉතාම භයානක මත්ද්‍රව්‍යයක් ලෙස බිල්ලෙක් මවා ඇති බවත් පාර්ලිමේන්තු මන්ත්‍රී ඩයනා ගමගේ මහත්මිය අද (13) පැවසුවාය.

ලෝක සෞඛ්‍ය සංවිධානය පසුගිය වසරේ දෙසැම්බර් මස පැවත්වූ සමුළුවේදී ‘කංසා’ අන්තරාදායක මත්ද්‍රව්‍යයක් නොවන බවට තීරණය කර ඒ සඳහා පනවා තිබූ තහනම ඉවත්කිරීමෙන් කංසා අපනයනට ශ්‍රී ලංකාවට තිබූ බාධාවක් ඉවත් වූ බව කී ඩයනා ගමගේ මහත්මිය කංසාවලින් ලබාගන්නා සීබීඩී තෙල්වලින් පිළිකා, විෂාදය ආදි රෝග රැසකට සහ වේදනා නාශකයක් ලෙස ද පාවිච්චි කරන බව ද සඳහන් කළේය.

ලොව පුරා රටවල් 45 ක් පමණ කංසා වගාවෙන් විශාල විදේශ විනිමයක් උපයන බවත් කී මන්ත්‍රීවරිය පැවසුවේ කංසා සඳහා ඉල්ලුම සියයට 1000 කින් ඉහළ ගොස් 2027 වන විට විදේශ විනියම වටිනාකම ඩොලර් බිලියන 140 ක් බවට පත්වනු ඇතැයි යුරෝපා සංවර්ධන අරමුදල ඇස්තමේන්තු කර ඇති බවත්ය.

ශ්‍රී ලංකා තුළ සංස්කෘතිය සමඟ බැඳුණු වසර 6000 ක ඉතිහාසයක් ‘කංසා’වලට ඇති බව සඳහන් කළ ඩයනා ගමගේ මහත්මිය රට මේ වන විට මුහුණ දී සිටින ඩොලර් හිඟයට දැනට ඉතිරි වී ඇති හොඳම විසඳුමක් ලෙස මෙය දකින බව ද කීවාය.

‘කංසා’ දේශීයව ‘ත්‍රෛයිලෝකවිජයා’ ලෙස හදුන්වන බවත් ‘කංසා’ දුම්වැටියක් හැටියටම පමණක් නොව කෑමවලට පාවිච්චි කිරීම වැනි බොහෝ ප්‍රයෝජන ඇති බවත් ඇය පවසන්නීය.

කංසා අපනයනය පිළිබඳව තමන් ඉදිරිපත් කළ යෝජනාවට බහුතරයක් ජනතාව එකඟ බව කී ඇය පැවසුවේ පොඩි කොටසක් මේක ගැන වැරදි මත ප්‍රකාශ කරමින් වලිගය අල්ලාගෙන සිටින බවත්ය. පාර්ලිමේන්තු මන්ත්‍රී ඩයනා ගමගේ මහත්මිය කොළඹදී විශේෂ මාධ්‍ය හමුවක් පවත්විමන් එසේ පැවසුවාය.