කසිප්පුවාගෙන් අල්ලස් ගත් පොලිසියේ දෙකක් කොටු

(ශ්‍රීනාත් ප්‍රසන්න ජයසූරිය)

පොලොන්නරුව කඩවලවැව ප්‍රදේශයේ පදිංචි කසිප්පු ජාවාරම්කරුවකු ගෙන් රුපියල් 9,000 ක  අල්ලසක ගත් බව කියන මින්නේරිය පොලීසියේ සැරයන්වරයකු සහ පොලිස් කොස්තාපල්වරයකු අත්අඩංගුවට ගත් බව අල්ලස් හෝ දූෂණ විමර්ශන කොමිසම පවසයි. 

කසිප්පු ජාවාරම්කරුවකු බව කියන පුද්ගලයා ගෙන් එම ජාවාරම බාධාවකින් තොරව දිගටම කරගෙන යෑම සඳහා යැයි කියමින් රජයේ අරක්කු බෝතල් තුනක් ඉල්ලා ඇතැයි අල්ලස් හෝ දූෂණ විමර්ශන කොමිසමේ උසස් නිලධාරියෙක් ලංකාදීපයට පැවැසීය.

රජයේ අරක්කු තමා ළඟ නොමැති නිසා මෙම ජාවාරම් කරු එම බෝතල් තුනේ වටිනාකමට රුපියල් නම දහසක් ලබා දිය හැකි බව පවසා ඇතැයි කොමිසමේ එම උසස් නිලධාරියා කීය.

ඊට කැමැත්ත පළ කළ පොලිස් සැරයන්වරයා සහ පොලිස් කොස්තාපල්වරයා එම මුදල් ලබා ගත් අවස්ථාවේ වැටලීමක් සිදුකර පොලිස් නිලධාරීන් දෙදෙනා සැකපිට අත්අඩංගුවට ගන්නා ලදැයි අල්ලස් හෝ දූෂණ විමර්ශන කොමිසම සඳහන් කරයි.

කසිප්පු ජාවාරමේ නිරතව සිටින බව කියන පුද්ගලයා කළ පැමිණිල්ලකට අනුව අල්ලස් හෝ දූෂණ විමර්ශන කොමිසමේ විමර්ශන නිලධාරීන් කණ්ඩායමක් මෙම වැටලීම සිදුකර ඇත.