(අජන්ත කුමාර අගලකඩ)

ඉකුත් රජය සමයේ සිදුවූ වංචා දුෂණ පිළිබඳ මාතෘකාව ඊයේ (15) පැවැති කැබිනට් රැස්වීම උණුසුම් කළ බව වාර්තාවේ.

වත්මන් රජය පත්වී වසර දෙක හමාරක් පමණ ගතවී ඇතත් පසුගිය රජයේ සිදුවූ  වංචා දුෂණ සම්බන්ධයෙන් මෙතෙක් පියවරක් ගෙන නැති බව ඇමැතිවරුන් කිහිප දෙනෙකුම කැබිනට් රැස්වීමේදී ප‍්‍රකාශ කර ඇතැයි රජයේ ආරංචිමාර්ග සඳහන් කරයි.

ඉදිරියේදී මැතිවරණවලටද යාමට තිබියදී එම දුෂණ වංචාවලට එරෙහිව පියවරක් නොගැනීම ගැටලූවක් බවත් මෙම තත්ත්වය හමුවේ ඇමැතිවරුන් වශයෙන් පාරේ බැස යාමට නොහැකි තත්ත්වයක් ඇතිව තිබෙන බවත් ඇමැති ජයවික‍්‍රම පෙරේරා මහතා කැබිනට් රැස්වීමේදී ප‍්‍රකාශ කර ඇති බව පැවැසේ.

එබැවින් පසුගිය රජය සමයේ සිදුවූ වංචා දුෂණවලට එරෙහිව වහාම පියවර ගන්නැයි ජයවික‍්‍රම පෙරේරා මහතා ඉල්ලීමක් කර ඇත.

රාජිත සේනාරත්න, පාඨලි චම්පික රණවක, මංගල සමරවීර, සරත් ෆොන්සේකා යන අමාත්‍යවරුන් ද මේ සම්බන්ධයෙන් දීර්ඝ වශයෙන් කරුණු දැක්වූ බව දැනගන්නට ඇත.

ඉකුත් රජයේ සිදුවී ඇති වංචා දුෂණ ගැන සෙවීමට විශේෂ අධිකරණයක් පිහිටුවන්නැයිද එම ඇමැතිවරුන් ඉල්ලීමක් කර ඇති බව වාර්තාවේ.

වංචා දුෂණ සම්බන්ධයෙන් කෙරෙන පරීක්ෂණ පිළිබඳව මෙහිදී ජනාධිපති මෛත‍්‍රීපාල සිරිසේන මහතා පොලිසිය භාර ඇමැති සාගල රත්නායක මහතාගෙන් විමසීමක් කර ඇති අතර ඒ පිළිබඳ පරීක්ෂණ කරගෙන යන බව සාගල රත්නායක මහතා පවසා ඇත.

වංචා දුෂණ නඩු ඇසීමට වෙනම අධිකරණයක් පිහිටුවන ලෙස ඇමැතිවරුන් ඉදිරිපත් කළ යෝජනාව තමා නීතිපතිවරයාට යොමුකළ බව පවසා ඇති අධිකරණ ඇමැති විජයදාස රාජපක්ෂ මහතා ඒ සඳහා ව්‍යවස්ථාව සංශෝධනය කළ යුතු යැයි නීතිපතිවරයා දන්වා එවා තිබූ බවද ප‍්‍රකාශ කර ඇත.

එබැවින් ව්‍යවස්ථාව සංශෝධනය කර දෙන්නේ නම් තමාට වෙනම අධිකරණයක් පිහිටුවීමට පියවර ගත හැකි බව අධිකරණ ඇමැතිවරයා පවසා ඇතැයිද වාර්තාවේ.

නව විදේශ ඇමැති ලෙස පත්වූ තිලක් මාරපන මහතාද ඒ සම්බන්ධයෙන් අදහස් දැක්වූ බව දැනගන්නට තිබේ.