(ඩයනා උදයංගනී)

රජයේ නිලධාරීන් විදේශ නිවාඩු ඉල්ලුම් කිරීම සඳහා භාවිත කරන ඒ 4 ප්‍රමාණයට වඩා විශාල පිටු 4කින් යුත් ආකෘති පත්‍රය, ඒ 4 ප්‍රමාණයේ පිටු 2කින් යුත් ආකෘති පත්‍රයක් බවට පත් කර, වාර්ෂිකව කඩදාසි විශාල ප්‍රමාණයක් ඉතිරි කරගැනීමට  රාජ්‍ය පරිපාලන ස්වදේශ කටයුතු, පළාත් සභා හා පළාත් පාලන අමාත්‍යංශය තීරණය කර තිබේ.

රාජ්‍ය සේවය තුළ ක්‍රියාත්මක අරපිරිමැස්ම ප්‍රතිපත්තිය මත, රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යවරයා ලෙස අග්‍රාමාත්‍ය දිනේෂ් ගුණවර්ධන මහතාගේ උපදෙස් මත මෙය ක්‍රියාත්මක කරන බව, අමාත්‍යංශ ලේකම් එම්.එම්.පී.කේ. මායාදුන්නේ මහතා පැවසීය.

මේ අනුව එම ආකෘති පත්‍රය සඳහා වන කඩදාසි භා වියදම සියයට 50කින් පමණ ඉතිරි කරගැනීමට හැකි  බවත්, වාර්ෂිකව විදේශ ගතවීම සඳහා ඉල්ලුම් කරන රජයේ සේවකයන් සංඛ්‍යාව ලක්ෂයකට අධික වන බැවින් නව තීරණයත් සමග රජයට සැලකිය යුතු තරම් කඩදාසි හා මුදල් ප්‍රමාණයක් ඉතිරි වන බවත් ඔහු සඳහන් කළේය.

පෙර ආකෘතියෙහි සඳහන්ව තිබූ සියලු කරුණු නව ආකෘති පත්‍රයට ඇතුළත් අතර, එය මුද්‍රණය සඳහා රජයේ මුද්‍රණ දෙපාර්තමේන්තුව වෙත මේ වනවිටත් යොමුකර තිබේ.