(යොහාන් භාසුර)

ජාති, ආගම්, උස්පහත් භේදයක් නොමැතිව සියලු දෙනාටම එකසේ නීතිය ක්‍රියාත්මක විය යුතුයි.  බේදයක් නොමැතිව සියලු දෙනාටම සමානව සළකන නීතියක් සකස් වියයුතු යැයි  මාතර දිස්ත්‍රික් ශාසනාරක්ෂක බලමණ්ඩලයේ ලේඛකාධිකාරී පරදුව ජිනරතන හිමියෝ පැවසූහ.

අතීතයේදී ශ්‍රී ලංකාව එක නීතියක් ක්‍රියාත්මක වූ රටක්ව වුවද විවිධ ආක්‍රමණත් සමග එය වෙනස් වූ බව කී පරදුව ජිනරතන ස්වාමීන්වහන්සේ මේ තත්ත්වය වෙනස් කර එක රටක, එක නීතියක් ස්ථාපනය කිරීමට ජනාධිපතිතුමා ගන්නා උත්සාහය අගය කරන බව ද සඳහන් කළහ.

‘එක රටක් එක නීතියක්‘ සඳහා වූ ජනාධිපති කාර්ය සාධක බලකාය දකුණු පළාතේ අදහස් විමසීම‍ෙ දික්වැල්ල ප්‍රාදේශීය ලේකම් කාර්යාලයීය ශ්‍රවණාගාරයේදී සිදු කෙරුණු අතර එහිදී අදහස් පළ කරමින් උන්වහන්සේ එසේ සඳහන් කළහ.

ආගමික නියෝජිතයෝ සහ වතුකම්කරු පිරිස් ද සිය යෝජනා කාර්ය සාධක බලකායට ඉදිරිපත් කළ අතර ඇතැම් පිරිස් ලිඛිත යෝජනා භාර දුන්හ.

නැගෙනහිර, ඌව පළාත්වල මෙන්ම කොළඹ බණ්ඩාරනායක සම්මන්ත්‍රණ ශාලාවේ පිහිටා ඇති කාර්යාලයකින් දී ද දිවයිනේ විවිධ පළාත් වලින් පැමිණි පිරිස් කාර්ය සාධක බලකාය හමුවේ මීට පෙර අදහස් ඉදිරිපත් කළහ. දකුණු එම කාර්ය සාධක බලකායේ සභාපති ගලගොඩඅත්තේ ඥානසාර හිමි, සෙසු සාමාජිකයන් වන මහාචාර්ය ශාන්ති නන්දන විජේසිංහ, නීතිඥ සංජය මාරඹේ ,එරන්ද නවරත්න, පානි වෑවලගේ යන මහත්වරු සහ ලේකම් ජීවන්ති සේනානායක මෙනෙවිය ඇතුළු පිරිසක් මේ අවස්ථාවට සහභාගී වූහ.