ශෂීන්ද්‍ර රාජපක්ෂ ඌවේ මහ ඇමැති වන්නේ කොළයට පමණක් බවත්, ජනතාවගේ මහ ඇමැති තමා බවත් ඌව පළාත් මැතිවරණයේ දී වැඩිම මනාප ප්‍රතිශතයක් ලබා ගත් හරීන් ප්‍රනාන්දු මහතා අද (24) සිරිකොත එජාප මූලස්ථානයේ පැවැති මාධ්‍ය හමුවක දී පැවසීය.

අඟහරුවාදා (23) පාර්ලිමේන්තු මන්ත්‍රී රුවන් විජයවර්ධන මහතා ධුරයෙන් ඉවත්  වූ ජාතික යොවුන් පෙරමුණේ සභාපති ධුරය තමා බාර නොගන්නා බවත්, නැවතත් එම ධුරය සඳහා රුවන් විජයවර්ධන මහතාගේ නම යෝජනා කරන බවත්, ඊට වඩා ලොකු වගකීමක් ඌවේ ජනතාව වෙනුවෙන් තමාට පැවරී ඇති බවත් ප්‍රනාන්දු මහතා කීවේය.

‘මෙවර ඡන්දෙට ඉදිරිපත් වෙන්න මා පාර්ලිමේන්තුවෙන් එළියට එද්දි මගේ ළඟ තිබුණේ රුපියල් 19000යි. කවුරුත් මේ කියන දේ විශ්වාස කරන්නේ නැතිවෙයි. නමුත් මාගේ ළඟම ඉන්න අය දන්නවා.

මගේ ගෙදර වාහන හයක් විතර තිබුණා. ඒත් පාසල් ගියේ ආවේ බසයෙන්. රගර් සෙල්ලම් කර ,   ඒක තමයි ඇත්ත. මේ ඡන්දෙට මා ඉදිරිපත් වනවාට පියා අකමැති වෙලා හිටියේ. ඒ නිසා මේ ඡන්දෙදි පියාගෙන් උදව්වක් ලැබුණේ නෑ. මටත් ඕනෑ වෙලා තිබුණා තාත්තටත් පෙන්වන්න මට තනියම ඡන්දෙ කරග ගන්න පුළුවන් කියලා.  සම්පූර්ණ ඡන්දෙට වියදම් කළේ මා නොවෙයි. මගේ නෑයො, යාළුවන් වගේම මා නොදන්න බොහෝ දෙනෙකු මට උදව් උපකාර කළා. මට උදව් කළ වැඩි දෙනෙක් මා අඳුනන්නෙත් නෑ. ‘

මං එක බත් පාර්සලයක්, අරක්කු බෝතලයක් බෙදුවේ නෑ. එරෙහි දුන්නා කියා ඔප්පු කළොත් පළාත් සභා විපක්ෂ නායක ධුරයෙන් මා අයින් වෙනවා.‘

හාලිඇළදී තමාට එල්ලවූ ප්‍රහාරය ගැන හා ඇමැතිවරුන් වන ඩිලාන් පෙරේරාගේ හා නිමල් සිරිපාල ද සිල්වා මහත්වරුන්ගේ ආසන පරාද වීම සම්බන්ධයෙන් ද ඔහු එම මාධ්‍ය සාකච්ඡාවේදී අදහස් දැක්වීය.