එෆ්.අස්ලම්

 

දිවයිනේ සෙසු පළාත් වලට වඩා වැඩිම දුරකින් පිහිටි පළාත් සභාවේ මහ ඇමැති වීමත් යාපනයේ සිට කොළඹ යාමට අධික කාලයක් මෙන්ම වෙහෙසක් දැරීමට සිදුවීමත් නිසා තමන්ට සහ තම ආරක්ෂකයාට ගුවන් මගින් කොළඹට යාමට අනුමැතිය ලැබී තිබෙන බව උතුරු පළාත් ප්‍රධාන අමාත්‍ය සී.වී.විග්නේෂ්වරන් මහතා පවසයි.

මාධ්‍ය ඔස්සේ නැඟෙන ප්‍රශ්නවලට පිළිතුරු සපයමින් සතියේ  ප්‍රශ්නය නමින් මාධ්‍ය වෙත නිකුත් කරන නිවේදනයෙන් මහ ඇමැතිවරයා මේ බව අවධාරණය කර තිබේ.

එම නිවේදනයේ  වැඩිදුරටත් මෙසේ ද  සඳහන්වී ඇත.

2014 වසරේ සිට ගුවන් මගින් කොළඹට පැමිණිම සඳහා මහ ඇමැතිවරයාට සහ ආරක්ෂක පොලිස් නිලධාරීයාට ගිය වියදම රුපියල් 1,809,500 ක් හෙවත් ලක්ෂ 18 ඉක්ම වන්නකි. එහිදි මහ ඇමැතිවරයාගේ ගුවන් ගමන් වියදම පමණක් ලක්ෂ 11 ඉක්මවයි.

මහ ඇමැති විදිහට මට ගුවන් මගින් කොළඹට යන්න ආරක්ෂාව,දුර ප්‍රමාණය,මහන්සිය හා සෞඛ්‍ය තත්ත්වය හේතු වුණා. අනෙක් පළාත්වල මහ ඇමැතිවරුන් එසේ ගමන් නොකරන බව ඇතැමුන් කියනවා. ශ්‍රී ලංකාවේ කොළඹ සිට ඉතාමත් දුරින් පිහිටි පළාත් සභාව පිහිටලා තියෙන්නෙ යාපනයේ.

සාමාන්‍යයෙන් යාපනේ සිට වාහනයක මහා මාර්ගයෙන් කොළඹට යනවා නම් පැය 7ක කාලයක් ගතවෙනවා. පැය 7ක් ගමන් කරල එදාම හෝ ඊට පසුදින  රාජකාරී කටයුතු, රැස්වීම්වල සාකච්ඡා සඳහා සහභාගී වෙන මහ ඇමැතිවරයා මමයි.

ඒ වගේ ගමන් කරන එකම දමිළ ජාතිකයාද මං විතරයි කියල හිතනවා.වයස අවුරුදු 75 සම්පූර්ණ කරපු ශ්‍රීලංකාවේ වයසම මහඇමැති මමයි.

ගුවන් මගින් කොළඹට යාමට මා හට එවක ආණ්ඩුකාරවරයාගෙන් අනුමැතිය ලැබුණා.ඒ කාලයේ ආණ්ඩුකාරවරයා පොලිස් විශේෂ කාර්ය බළකායේ නිලධාරීන් 15ක් 20ක් විතර මගේ ආරක්ෂාවට ලබා දුන්නා.

වාහන ඉන්ධන වියදම්, විශේෂ කාර්ය බළකා ආරක්ෂකයින්ගේ වියදම් ගැන කතා කරන්න කවුරුත් නැහැ. අද නවක දමිල පාර්ලිමේන්තු මන්ත්‍රීවරුන් පවා ඒ වගේ ආරක්ෂාවක් ලබාගෙන තිබෙනවා.

මගේ ආරක්ෂාවට ඉන්නේ  පොලිස් නිලධාරීන් දෙතුන් දෙනෙකු විතරයි. ඒ අතරින් එක් අයකු පමණක් මම ගුවන් ගමන් වලදී එක්ක යනවා. ගුවන් හමුදා යානාවල ගුවන් ගමන් වලදී පොලිසියෙන් අයකිරීමක් සිදුකරන්නේ නැහැ.