(සුජිත් හේවාජුලිගේ සහ  අංජුල මහික වීරරත්න)

ක්ලබ් වසන්ත  ඝාතනයේ සැකකරුවකු  මාධ්‍ය ඉදිරියේ විවෘත කරගෙන ප්‍රශ්න අහපු නිලධාරීන් නීතිය රැහැනට ගත යුතු බව අධිකරණ බන්ධනාගාර කටයුතු  සහ ආණ්ඩුක්‍රම ව්‍යවස්ථාව ප්‍රතිසංස්කරණ අමාත්‍ය ආචාර්ය විජයදාස රාජපක්ෂ මහතා පාර්ලිමේන්තුවේදී අද (12)  පැවසීය.

මේ අධිකරණයට කළ අපහාසයක් බව පැවසූ අමාත්‍යවරයා පොලිසිය නඩු ඇසූ හෙයින් දැන් විනිසුරුවරුන්ට කිරීමට දෙයක් නැතැයිද සඳහන් කළේය.

මේ නඩුවෙන් යුක්තිය ඉෂ්ට වේවි යැයි තමා නොසිතන බවද ඔහු කීවේය.

රාජපක්ෂ මහතා මෙසේ පැවසූවේ  එම සිද්ධිය සම්බන්ධයෙන් කුරුණෑගල දිස්ත්‍රික් මන්ත්‍රී  නීතිඥ දයාසිරි ජයසේකර මහතා මතු කළ ප්‍රශ්නයකට පිළිතුරු දෙමිනි.

විජයදාස රාජපක්ෂ මහතා මෙසේද පැවසීය.

  පොලිසිය නඩුව අහලා ඉවරයි.  විනිසුරුවරුන්ට කරන්න දෙයක් නැහැ. මහා ව්‍යාකූල තත්ත්වයක් .

මේ වගේ දෙයක් වුණාම විනිසුරුවරයෙකුට වගකීමක් තියෙනවා. .ඒ තැනැත්ත අත්අඩංගුවට ගන්න. එයා පොලිස් නිලධාරියෙක්ද හමුදා නිලධාරියෙක්ද කියලා අදාල නැහැ.  ඒක තමයි මේ රටේ නීතිය. ඒ වගේම පොලිස්පතිතුමාටත් වගකීමක් තියෙනවා මේ වගේ නිලධාරීන් සම්බන්ධයෙන් කටයුතු කරන්න.

මේ වගේ නිලධාරීන් එක්ක අපරාධ නඩු විභාග කරන්නේ කොහොමද.  මේ විදිහට අපරාධ නඩු විසඳන්න පුළුවන්ද. මේ වගේ දේවල් වෙනකොට  අවසානයේදී අධිකරණ ක්‍ර ක්‍රියාදාමය පිළිබඳව මේ රටේ මිනිස්සුන්ට තියෙන විශ්වාසය බිඳ වැටෙනවා. ඒකෙන් වෙන්නේ රට අරාජක වීමක්.