(නිමල කොඩිතුවක්කු)

දවසේ පැය 24 ඇතුළත ඝාතන තුන හතරක් පිළිබඳ අහන්නට ලැබෙන බවත් දිනෙන් දින සිදුවන වෙඩි තැබීම් හේතුවෙන් ජනතාව විශාල  භීතියකට පත්ව ඇති බවත් පාර්ලිමේන්තු මන්ත්‍රී ජේ. සී. අලවතුවල මහතා කොළඹදී අද (22) පැවසීය.

දීර්ඝ කාලයක් තිස්සේ සිදුවන ඝාතන රැල්ල නැවැත්වීම සඳහා ගත් පියවර කුමක්දැයි පොලීසිය භාර ඇමතිවරයාගෙන් විමසන බවත්  මන්ත්‍රීවරයා සඳහන් කළේය.

පුරවැසියන්ට ජීවත්වීමට අවශ්‍ය ආරක්ෂාව සැලසීමට ආණ්ඩුව අපොහොසත් වී ඇති බව රට පුරා සිදුවන වෙඩි තැබීම් වලින් පෙනී යන බවත් විපක්ෂ නායක කාර්යාලයේ පැවති මාධ්‍ය හමුවේදී අදහස් දක්වමින් ඔහු පැවසීය.

දැඩි ආර්ථික අර්බුදයකින් පීඩාවට පත්ව සිටින ජනතාවගේ ජීවත් වීමට අවශ්‍ය ආරක්ෂාව හෝ තහවුරු කරන්නැයි ආණ්ඩුවෙන් ඉල්ලීමක් කරන බවත් මන්ත්‍රීවරයා සඳහන් කළේය.