(සුජිත් හේවාජුලිගේ)

දේශපාලන ස්ථාවරත්වය ඇති කර ආර්ථික අර්බුදය ජය ගැනීමට නව අගමැතිවරයා ප්‍රමුඛ ආණ්ඩුවට හැකියාව ලැබෙනු ඇතැයි තමා අපේක්ෂා කරන බව  ශ්‍රී ලංකාවේ ඇමරිකානු එක්සත් ජනපද තානාපතිනි ජුලී චන්ග් මහත්මිය පැවසුවාය.

එසේම ජනතාව අපේක්ෂා කරන දේශපාලන ප්‍රතිසංස්කරණ  සිදු කර ප්‍රජාතන්ත්‍රවාදය ආරක්ෂා කර ගැනීමේ අවශ්‍යතාවද තානාපතිවරිය  අවධාරණය කළාය.

ඇය මෙසේ අවධාරණය කළේ  කතානායක මහින්ද යාපා අබේවර්ධන මහතා පාර්ලිමේන්තු සංකීර්ණයේදී අද (27) පෙරවරුවේ  හමුවූ අවස්ථාවේදීය.

ජුලී චන්ග් මහත්මිය  ඇමරිකානු එක්සත් ජනපද  තානාපතිනිය ලෙස පත්වීමෙන් පසුව  කතානායකවරයා  හමුවූ පළමු අවස්ථාව මෙයයි.

ශ්‍රී ලංකා - ඇමරිකානු එක්සත් ජනපද පාර්ලිමේන්තු මිත්‍රත්ව සංසදය හරහා දෙරට අතර පවතින සබදතා වැඩිදියුණු කර ගැනීමට  අපේක්ෂා කරන බවද ජුලී චන්ග් මහත්මිය පැවසුවාය.

පාර්ලිමේන්තු කාන්තා මන්ත්‍රීවරියන්ගේ සංසදය සිදුකරන කාර්යභාරය ඇගයීමට ලක්කළ  තානාපතිවරිය  පාර්ලිමේන්තුවේ කාන්තා නියෝජනය වැඩිකිරීමේ අවශ්‍යතාවද  අවධාරණය කළාය.

මෙරට ප්‍රජාතන්ත්‍රවාදය ශක්තිමත් කිරීමට ඇමරිකානු එක්සත් ජනපදය නිරතුරුව ලබා දෙන ශක්තිය පිළිබදව  කතානායකවරයා සිය කෘතවේදීත්වය පළ කළේය.

මේ අවස්ථාවට පාර්ලිමේන්තුවේ මහලේකම් ධම්මික දසනායක මහතාද සහභාගීවිය.