සියලුම පළාත් ආණ්ඩුකාරවරුන්ගේ බලතල අඩුකරන ලෙස  දෙමළ ජාතික සන්ධානයත් උතුරු පළාත් සභාවත් රජයෙන් ඉල්ලීමක් කර ඇතැයි උතුරු පළාත් සභාවේ සභාපති සී.වී.කේ.සිවඥානම් පැවසීය.

උතුරු පළාත් සභාවේ සභාපති සී.වී.කේ.ශිවඥානම් මේ බව පැවසුවේ උතුරු පළාත් සභාවට ඉඩම් බලතල අවශ්‍ය බවට පසුගියදා උතුරු මහ ඇමැතිවරයා කළ ඉල්ලීම සම්බන්ධයෙන් විමසීමේදීය.

‘මෙම යෝජනාව නව ආණ්ඩුක්‍රම ව්‍යවස්ථාව සංශෝධනය කරන විට සලකා බැලීම සඳහා ද දෙමළ ජාතික සන්ධානය වීසින් රජයට ඉදිරිපත් කර තිබෙනවා. ආණ්ඩුකාරවරුන්ගේ බලතල අඩුකරන ලෙස ඉල්ලා සිටින නමුත් ආණ්ඩුකාරවරයා පත්කිරීම ජනාධිපතිවරයා විසින් සිදුකිරීම පිළිබදව දෙමළ ජාතික සන්ධානය හෝ උතුරු පළාත් සභාව විරුද්ධත්වයක් නෑ‘ යැයිද සභාපතිවරයා කියා සිටියේය.

උතුරු පළාත් සභාවේ දෙමළ ජාතික සන්ධානයේ මන්ත්‍රී එම්.කේ.ශිවාජිලිංගම්ගෙන් විමසීමේදි කියා සිටියේ ආණ්ඩුකාරවරයා යන වචනයෙන් පවා අසීමිත බලයක් ඔවුන් වෙත පැවරී ඇති බව ගම්‍ය වන අතර ආණ්ඩුකාරවරයා විධායක ජනාධිපතිවරයාගේ නියෝජිතයෙකු බැවින් ඔහුට විශාල බලයක් හිමිවීම නිසා පළාත් සභාවල සෙසු නියෝජිතයින්ට ආණ්ඩුකාරවරයාගේ නිර්දේශයකින් තොරව කිසිවක් කරගැනීමට පවා නොහැකි නිසා දෙමළ ජාතික සන්ධානය රජයට මෙම යෝජනාව ඉදිරිපත් කළ බවයි.