(සුජිත් හේවාජුලිගේ )

අස්වැසුම සහනාධාර වැඩසටහනට ඇතුළත් නොවූ පවුල්වලට සිය දුක්ගැනවිලි ලබන මස 10 දක්වා බාරදීමට හැකියාව පවතින බව අග්‍රාමාත්‍ය දිනේෂ් ගුණවර්ධන මහතා පැවසීය.

අභියාචනා සමෘධි සංවර්ධන නිලධාරින්ට හෝ ප්‍රාදේශීය ලේකම් කාර්යාලවලට බාරදීමට හැකි බවද ඔහු සඳහන් කළේය.

එම සහනාධාර පෙර දුන් ප්‍රමාණයටත් වඩා ලබාදීමට බලාපොරොත්තු වන බව පැවසූ අග්‍රාමාත්‍යවරයා සැබෑ අඩු ආදායම්ලාභී පවුල් මෙම වැඩසටහනට ඇතුළත් කර ගැනීම සඳහා සියලු දෙනා සමඟ එක්ව කටයුතු කරන්නැයි ඉල්ලීමක් කරන බවද ප්‍රකාශ කළේය.

මහජන නියෝජිතයන් සහ රාජ්‍ය නිලධාරීන් නිලධාරීන් සියලු දෙනා එක්ව මෙම වැඩසටහන සාර්ථක කර ගැනීමට කැපවිය යුතු බවත් අඩු ආදායම්ලාභීන් හා විවිධ රෝගවලට ගොදුරු වී ඇති ජනතාව කිසිවකුට මෙම සහනාධාර අහිමි කිරීමට ඉඩ නොතබන බවත් ඔහු පැවසීය.

මේ අතර අස්වැසුම වැඩසටහනින් සැබෑ දුප්පත් විශාල පිරිසක් ඉවත් වී ඇති හැකි පිරිසක් ඇතුළත්ව ඇති බවට ආණ්ඩු පක්ෂයේ මන්ත්‍රීවරුන් ඇතුළු මන්ත්‍රීවරු රැසක් කතානායකවරයාට පාර්ලිමේන්තුවේදී පසුගිය 23 වැනිදා පෙන්වා දුන්හ.