(නිමල කොඩිතුවක්කු)

රට තුළ සමගියක්, ජාතික ප්‍රතිපත්තිමය එකඟත්වයක් නොමැතිව පවතින අර්බුදවලින් කිසිම ආකාරයකින් ගොඩ ඒමට හැකියාවක් නොමැති බව සාධාරණ සමාජයක් සඳහා වන ජාතික ව්‍යාපාරයේ සභාපති හිටපු කථානායක කරු ජයසූරිය මහතා කොළඹදී පැවසීය.

රටේ ප්‍රශ්ණ විසඳීමට ජාතික හා ආගමික සමගිය මෙන්ම ජාතික එකගතාවය ඉතාමත්ම අවශ්‍ය බව  පාලකයන් තේරුම් ගත යුතුව ඇතැයිද   ජයසූරිය මහතා සඳහන් කළේය.

සාධාරණ සමාජයක් සඳහා වන ජාතික ව්‍යාපාරයත්, ජාතික ආගමික සංහිඳියාව සඳහා වූ ජාතික එකමුතුවත්, එක්ව සංවිධානය කරන ලද “යහපත් රටක් උදෙසා නව ආණ්ඩුක්‍රම ව්‍යවස්ථාවක්” කුරුණෑගල දිස්ත්‍රික් සමුළුවේ දී අදහස් දක්වමින් ඔහු මේ බව පැවසීය.

“රටේ ප්‍රශ්ණ විසඳීමටත් ජාතික හා ආගමික සමගිය මෙන්ම ජාතික එකගතාවය ඉතාමත්ම අවශ්‍යයි. මෙහිදී පක්ෂ පාට භේද තිබෙන්නට බැහැ. අප සියලු සියලු දෙනා එක්වී මෙය පාලනය කළ යුතුයි.

විදේශ මුදල් හිඟය, ඩීසල් හිඟය, ආහාර ද්‍රව්‍ය හිඟය, ගෑස් හිඟය, කිරිපිටි හිඟය වහා විසඳිය යුතු දැවෙන ප්‍රශ්න විදියට අපි දකිනවා. අවාසනාවකට විදුලි කප්පාදුවක් ඇතිවුණොත්, එය එදිනෙදා ජන ජීවිතයට තදින්ම බලපානවා. එමෙන්ම සෞඛ්‍ය සේවයට, ජල සැපයුමට, නිෂ්පාදනයට, ජාතික ආරක්ෂාවට මෙයින් දැඩි ගැටලු ඇතිවේවි.

මෙම භයානක තත්ත්වය විසඳීම සඳහා රජයේ පාර්ශ්වයෙන් ස්ථීර යෝජනා අප දැක නැහැ. ආණ්ඩු පාර්ෂවය හා විපක්ෂ පාර්ෂවය අතර සාකච්ඡා ඇතිවී නැහැ. ඇමතිවරුන් අතර වාද විවාද ඇති වෙනවා වෙනුවට රජය සහ මුදල් අමාත්‍යවරයා මෙහිදී මූලිකත්වය ගත යුතුයි. ගැටලුව ඇති වුණාට පසු විසඳීම ලේසි වන්නේ නැහැ යතාර්ථය එයයි.

රටකට ජාතිය එකමුතු කළ හැකි ව්‍යවස්ථාවක් අවශ්‍යයි. සෑම ජන කොටසකටම ආත්ම ගරුත්වයෙන් යුතුව ජීවත්විය හැකි පරිසරයක් නිර්මාණය විය යුතුයි. එම නිසා ජනාධිපතිතුමා රටට පොරොන්දු වූ ආකාරයට ජනතාව හා පාර්ලිමේන්තුව මගින් සකස් වන ව්‍යවස්ථාවක් එළිදැක්වීම තවත් කල් නොදමන ලෙස ඉල්ලා සිටිනවා. එතුමා පොරොන්දු වූ කාලය ඉක්මවා ගොස් තිබෙනවා.

එමෙන්ම ප්‍රජාතන්ත්‍රවාදය සුරකින රටක් වශයෙන් ලෝකයා ගේ ගෞරවය අප උපයාගත යුතුයි. ආයෝජකයන්ගේ විශ්වාසය දිනාගත යුතුයි. 20 වැනි සංශෝධනය නිසා ප්‍රජාතන්ත්‍රවාදයට විශාල හානියක් හා විනාශයක් සිදු වුණා. එය වහා නිවැරදි කළ යුතුයි” යැයිද ඔහු එහිදී පැවසීය.