(සුජිත් හේවාජුලිගේ )

අරගලකරුවන් අතර සිටි ප්‍රචණ්ඩකාරීන් විසින් විනාශ කෙරුණු ශ්‍රී ලංකා පොදුජන පෙරමුණේ මන්ත්‍රීවරුන්ගේ නිවාස ඉදිකරගැනීම සඳහා රජයෙන් කිසිදු අනුග්‍රහයක් මෙතෙක් ලැබී නැතැයි එම මන්ත්‍රීවරු චෝදනා කරති.

ගෝඨාභය රාජපක්ෂ මහතා ජනාධිපතිවරයා ලෙස සිටියදී නිවාස ඉදිකරගැනීම සඳහා යම් ආධාරයක් කර ඇතත් වර්තමාන රජයෙන් ඒ සඳහා කිසිදු අනුග්‍රහයක් මෙතෙක් ලැබී නැතැයි ඔවුහු පෙන්වා දෙති.

මන්ත්‍රීවරුන්ගේ නිවාස ඉදිකරගැනීම මේ හේතුව නිසා තවදුරටත් ප්‍රමාද වෙමින් පවතින බව වාර්තා වේ

ප්‍රචණ්ඩකාරීන් විසින් විනාශ කරන ලද මන්ත්‍රීවරුන්ගේ නිවාස ඉදිකර ගැනීම සඳහා අවශ්‍ය සහයෝගය ලබාදෙන බවට රනිල් වික්‍රමසිංහ මහතා අනුප්‍රාප්තික ජනාධිපතිවරයා ලෙස පත්වීමට පෙර ශ්‍රී ලංකා පොදුජන පෙරමුණට පොරොන්දුවක් ලබා දුන්නේය.

දේපළ හානි වූ මන්ත්‍රීවරුන්ට බත්තරමුල්ලේ වියත් පුර නිවාස යෝජනා ක්‍රමයෙන් නිවාස කුලී පදනම මත ලබා ගැනීමට අවස්ථාව සලසා දී ඇති අතර එම නිවාස දැනට ලබාගෙන ඇත්තේ මන්ත්‍රීවරුන් කිහිප දෙනෙකු පමණක් බව වාර්තා වේ.

විශාල මාසික වාරිකයක් පවතින හෙයින් එම නිවාස ලබා ගැනීම ඉතා දුෂ්කර බව මන්ත්‍රීවරු පිරිසක් පැවසූහ.

මේ අතර ප්‍රචණ්ඩකාරීන් පිරිසක් විසින් ඝාතනය කෙරුණු ශ්‍රී ලංකා පොදුජන පෙරමුණේ පොලොන්නරු දිස්ත්‍රික් පාර්ලිමේන්තු මන්ත්‍රී අමරකීර්ති අතුකෝරල මහතාගේ පවුලේ උදවියටද මෙතෙක් කිසිදු ආධාරයක් ලැබී නැතැයි වාර්තා වේ.

පසුගියදා පැවති ආණ්ඩු පක්ෂ රැස්වීමේදී මේ සම්බන්ධයෙන් අදහස් දක්වා ඇති හිටපු අමාත්‍ය විමලවීර දිසානායක මහතා ප්‍රකාශ කර ඇත්තේ අමරකීර්ති අතුකෝරල මහතාගේ පවුලේ උදවියට මෙතෙක් කිසිදු සහනයක් ලැබී නැති හෙයින් ඒ සඳහා වහාම කටයුතු කරන ලෙස ජනාධිපතිවරයාගෙන් ඉල්ලා සිටින බවයි.

අරගල කරුවන් අතර සිටි ප්‍රචණ්ඩකාරීන් විසින් ඉකුත් මැයි මස 9 වැනිදා කරන ලද ප්‍රහාරවලින් ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රීවරුන් සහ පළාත් පාලන ආයතන නියෝජිතයන් සියයකට ආසන්න පිරිසකගේ නිවාස ඇතුලු දේපළ විනාශයට පත්විය.