සුමිත් පොතුපිටිය සහ බිමල් ශ්‍යාමන් ජයසිංහ

දුලාන් සමීර සම්පත් නොහොත් ‘‘අබ්බා‘‘ නැමැත්තා පොලිස් විශේෂ කාර්ය බළකාය සමග ඇතිවූ වෙඩි හුවමාරුවකදී මරුමුවට පත්ව ඇතැයි එගොඩඋයන පොලිසිය පවසයි .

වෙඩි ප්‍රහාරයේ දී විශේෂ කාර්ය බලකා සෙබළකුද සුළු තුවාල ලබා පානදුර මූලික රෝහලට ඇතුලත් කර තිබේ.

මියගොස් ඇති තැනැත්තා විදේශ රටක සැඟව සිටිමින් මහා පරිමාණයෙන් මත්ද්‍රව්‍ය ජාවාරම් කරන බව කියන ‘‘පානදුර සළිදු‘‘ නැමැත්තාගේ ප්‍රධාන ගෝලයකු බවද පොලිසිය කියයි.

විශේෂ කාර්ය බළකාය එගොඩඋයන ,මෝදර, ජාතික නිවාස ප්‍රදේශයේ සිදුකල සෝදිසි මෙහෙයුමක් අතරතුර , නිවසක කාමරයක් තුලදී රාත්‍රි 11 ට පමණ වෙඩිතැබීම සිදුව ඇතැයි පැවසේ.

වෙඩි ප්‍රහාරයෙන් බරපතළ තුවාල ලබා සිටී අබ්බා නැමැත්තා සහ සුළු තුවාල ලැබූ සෙබළා පානදුර මූලික රෝහලට ඇතුළත් කර ඇති අතර , සුලු වේලාවකදී අබ්බා නැමැත්තා මියගොස් ඇති බව රෝහල් ආරංචි මාර්ග සදහන් කරයි.

වෙඩි ප්‍රහාරය එල්ලවූ කාමරය තුල විශාල ලේ ප්‍රමාණයක් ගලාගොස් තිබූ අයුරුද දැකගත හැකිවිය .

ගල්කිස්ස අපරාධ ස්ථාන පරීක්ෂණාගාර නිලධාරීන් පරීක්ෂණ සිදුකල අතර , වෙඩිතැබීමට යොදාගත් ගිනි අවිය සහ සගවා ඇති බව කියන ආයුධ සොයා සෝදිසි මෙහෙයුමක් සිදුකරන බවද උසස් පොලිස් නිලධාරියෙක් කීය .

එගොඩඋයන , මෝදර ප්‍රදේශයේ සහ පානදුර මූලික රෝහලේ විශේෂ කාර්ය බළකා නිලධාරීන් ගෙන් සමන්විත විශේෂ පොලිස් ආරක්ෂාවක්‍ යොදා තිබේ.