අධ්‍යාපන පොදු සහතික පත්‍ර සාමාන්‍ය පෙළ විභාගය තවදුරටත් තීරණාත්මක කඩයිමක් නොවනු ඇතැයි ද සිසුන් සමත් කිරීමක් හෝ අසමත් කිරීමක් මෙම විභාගයෙන් නොකරනු ඇතැයි ද හඳුන්වාදීමට යන නව අධ්‍යාපන ක්‍රමය අනුව හොඳ සිසුන් ඉහළ පන්තියට සමත් කරනු ඇතැයිද අග්‍රාමාත්‍ය රනිල් වික්‍රමසිංහ මහතා මීගමුව නිව්ස්ටඩ් බාලිකා විදුහලේ 200 වැනි සංවත්සරය අමතමින් ප්‍රකාශ කළේය.

අපොස උසස් පෙළ විභාගයෙන් පසුව සරසවියට ඇතුළුවීමට බලාපොරොත්තුවන සිසුනට පමණක් සාමාන්‍ය පෙළ විභාගයේදී විෂයයන් කිහිපයක් අනිවාර්ය කරනු ඇතැයි ද අගමැති පැවසීය.

අපොස සාමාන්‍ය පෙළ විභාගයෙන් පසුව සියලුම සිසුන් පාසලේ ඊළඟ පෙළට උසස් කරන බවත් සිසුන් විභාග බරින් නිදහස් කිරීම රජයේ අරමුණ බවත් අගමැති කීවේය. ලොව බලගතුම රටවන ඇමරිකාවේ අධ්‍යාපන ප්‍රතිපත්තිය යටතේ විභාග නොපැවැත්වෙන බවද ඊට සමාන පිළිවෙතක් ශ්‍රී ලංකාවද අනුගමනය කළ යුතු බවද අගමැති සඳහන් කළේය.