(විමුක්ති එස් රුද්‍රිගු)

ජාතික ජන බලවේගයේ නායක අනුර කුමාර දිසානායක මහතා ඇතුළු 25 දෙනෙකුට කොළඹ කොටුව ප්‍රදේශ කිහිපයක විරෝධතා පැවැත්වීම සහ විරෝධතා පාගමන් වල නියැලීම අද(26) පස්වරු 1 සිට රාත්‍රී 8 දක්වා වළකාලමින් කොටුව මහේස්ත්‍රාත් අධිකරණය නියෝගයක් නිකුත් කළේය

කොල්ලුපිටිය, කොම්පඤ්ඤවීදිය සහ කොටුව පොලිස් බල ප්‍රදේශයන්හි විරෝධතා පෙළපාලියක් පැවැත්වීමට විරෝධතාකරුවන් පිරිසක් සැලසුම් කර ඇති බවත් ජනාධිපති කාර්යාලය සහ තවත් ගොඩනැගිලිවලට විරෝධතාකරුවන් ඇතුළුවීමට සැලසුමක් තිබෙන බවත් ඒ හේතුවෙන් එය වළකාලන නියෝගයක් නිකුත් කරන ලෙසත් කොටුව පොලිසිය කොටුව මහේස්ත්‍රාත් අධිකරණයෙන් ඉල්ලීමක් කර ඇත.

ඒ අනුව විරෝධතාකරුවන්ට ජනාධිපති කාර්යාලයට, ජනාධිපති මන්දිරයට, මුදල් අමාත්‍යාංශයට සහ ගාලුමුවදොර පිටිය ප්‍රදේශයට ඇතුළු නොවන ලෙසත් මහජනතාවට සහ රියදුරන්ට අපහසුතාවයක් ඇතිවන පරිදි මාර්ග අවහිර නොකරන ලෙසත් පොදු හා පෞද්ගලික දේපොළවලට හානි නොකරන ලෙසත්, ප්‍රචණ්ඩකාරී ක්‍රියා වලට සම්බන්ධ නොවන ලෙසත් කොටුව මහේස්ත්‍රාත් අධිකරණය නිකුත් කළ නියෝගයේ දැක්වේ.