(ජේ.ඉඳුරුවගේ )

ඉදිරියේදී පැවැත්වීමට නියමිත 2023/2024 සාමාන්‍ය පෙළ විභාගයට අයදුම් කරන පුද්ගලික අයදුම්කරුවන් සඳහා විභාග දෙපාර්තමේන්තුව විශේෂ කොන්දේසි කිහිපයක් පනවා තිබේ.

ඒ අනුව මෙම වර්ෂයේ සිට මෙම විභාගයට පුද්ගලික අයදුම්කරුවන් ලෙස ඉදිරිපත් වීමට අයදුම් කරන්නන් ඒ සඳහා ජාතික හැඳුනුම්පත ලබා තිබීම අනිවාර්ය කර තිබේ.

තවද ජාතික හැඳුනුම්පත නොමැති වයස අවුරුදු 15 ට අඩු අයදුම්කරුවන් මෙම විභාගයට පෙනී සිටීමට අපේක්ෂා කරන්නේනම් ඔවුන් විභාගයට ඉල්ලුම් කිරීම සඳහා අනිවාර්යයෙන් විභාග දෙපාර්තමේන්තුවට පැමිණිය යුතුය.

රජයේ පාසලක හෝ රජය අනුමත පුද්ගලික පාසලක ඉගෙනුම ලබමින් සිටින සිසුන්ට පුද්ගලික අයදුම්කරුවන් ලෙස විභාගයට අයදුම් කිරීම හෝ විභාගයට පෙනී සිටීම සපුරා තහනම් බවද විභාග දෙපාර්තමේන්තුව පවසයි.

කෙසේ හෝ එම නියමය නොතකා විභාගයට පෙනී සිට ඒ බව අනාවරණය වුවහොත් එවැනි අයදුම්කරුවන්ගේ විභාග ප්‍රතිඵල අවලංගු කර ඉදිරි විභාගවලට පෙනී සිටීමද ඔවුනට තහනම් කරන බව විභාග දෙපාර්තමේන්තුව අවධාරණය කරයි.

එමෙන්ම පුද්ගලික අයදුම්කරුවන් ලෙස විභාගයට ඉල්ලුම් කළ හැක්කේ රජයේ පාසලක හෝ රජය අනුමත පුද්ගලික පාසලකින් ශිෂ්‍ය කාර්ය දර්ශකය (අස්වීම් සහතිකය ) ලබා ඇති අයදුම්කරුවන්ට පමණක් බවද විභාග දෙපාර්තමේන්තුව නිවේදනය කර ඇත.

විභාග දෙපාර්තමේන්තුව විසින් මෙම විභාගයට ඔන්ලයින් ක්‍රමයට පමණක් අද සිට පෙබරවාරි 15 මධ්‍යම රාත්‍රිය දක්වා අයදුම් පත් කැඳවා තිබේ.