(තිළිණි ද සිල්වා සහ රංජන් කටුගම්පොළ)

මහනුවර ශ්‍රී දළඳා මාළිගය ඉදිරිපිට වසා දමා ඇති ඒ ‐26 මාර්ගය යම්හෙයකින් නැවත විවෘත කළහොත් එයින් ඇති වන අහිතකර බලපෑම දළඳා මාළිගාවේ අත්තිවාරමට පවා විශාල හානියක් සිදුවිය හැකි බව ජනාධිපති නීතීඥ සංජීව ජයවර්ධන මහතා අද (01) ශ්‍රේෂ්ඨාධිකරණය හමුවේ  දැන්වීය.

ශ්‍රී දළඳා මාළිගාව වෙනුවෙන් පෙනී සිටිමින් ජනාධිපති නීතීඥවරයා මේ බව කියා සිටියේය.

එබැවින් මාළිගාව ඉදිරිපිට පිහිටි එම මාර්ගය විවෘත කීරීමට සම්පූර්ණයෙන්ම විරුද්ධත්වය පළ කරන බව ජනාධිපති නීතීඥ සංජීව ජයවර්ධන මහතා කීය.

වසා දමා ඇති මහනුවර දළඳා මාළිගය ඉදිරිපස පිහිටි ඒ ‐ 26  මාර්ගය විවෘත කරන නියෝගයක් නිකුත් කරන්නැයි ඉල්ලා මහනුවර පදිංචිකරුවන් පිරිසක් විසින් ගොනු කරනු ලැබූ මූලික අයිතිවාසිකම් පෙත්සම අද ශ්‍රේෂ්ඨාධිකරණය හමුවේ කැඳවූ අවස්ථාවේදී හෙතෙම මේ බව කීය.

මෙම පෙත්සම බුවනෙක අළුවිහාරේ ,ප‍්‍රියන්ත ජයවර්ධන සහ නලීන් පෙරේරා යන ශ්‍රේෂ්ඨාධීකරණ ත‍්‍රිපුද්ගල විනිසුරු මඩුල්ල හමුවේ කැඳවිණි.

මහනුවර ප‍්‍රදේශයේ පදිංචිකරුවන් සිව්දෙනෙකු ගොනු කළ මෙම පෙත්සමේ වගඋත්තරකරුවන් වශයෙන් මාර්ග සංවර්ධන අධිකාරිය , මහනුවර විධායක ඉංජිනේරුවරයා, මහනුවර මහනගර සභාව, උසස් අධ්‍යාපන හා මහාමාර්ග අමාත්‍ය ලක්ෂ්මන් කිරිඇල්ල මහතා , පොලිස්පති පූජිත් ජයසුන්දර මහතා සහ නීතිපතිවරයා ඇතුළු පිරිසක් නම් කරනු ලැබ සිටිති.

දළඳා මාළිගය ඉදිරිපස පිහිටි ඒ‐26  මාර්ගය වසර කිහිපයක් තිස්සේ වසා දමා තැබීමෙන් මහනුවර නගරයේ වායු දූෂණයක් හා දැඩි වාහන තදබදයක් පැවතීම හේතුවෙන් තමා ඇතුළු මහජනතාව  අසීරුතාවට පත්වීමෙන් සිය මූලික අයිතිවාසිකම් උල්ලංඝනය වී ඇති බව පෙත්සමේ සඳහන් වෙයි.

එබැවින් එම ප‍්‍රධාන මාර්ගය විවෘත කරන ලෙසට අදාළ බලධාරීන්ට නියෝග කරන්නැයි මෙම පෙත්සම මඟින් ඉල්ලා තිබිණි.

මේ සියලූ කරුණු සලකා බැලූ ශ්‍රේෂ්ඨාධිකරණය මහනුවර දළඳා මාළිගය ඉදිරිපස පිහිටි ඒ ‐ 26  මාර්ගය වසා දැමීමට එරෙහි පෙත්සම සලකා බැලීමට කාලවේලාව ප‍්‍රමාණවත් නොවීම නිසා වැඩිදුරටත් කරුණු සලකා බැලීම නොවැම්බ්ර 13 වැනිදාට කල් තබන ලදී.