(ඩයනා උදයංගනී)

ගෑස් ඇතුළු අත්‍යාවශ්‍ය සේවා රැසක මිල ඉහළ යාම හේතුවෙන් ආපන ශාලා නිෂ්පාදනයන්හි මිල ඉහළ යා හැකි බැවින් පාරිභෝගිකයා පිළිබඳ සිතා එම නිෂ්පාදන කිහිපයකට උපරිම මිලක් පැනවීමට තීරණය කර ඇතැයි සමස්ත ලංකා ආපන ශාලා හිමියන්ගේ සංගමය පවසයි.
ඒ අනුව තේ කෝප්පයක් රුපියල් 20ක්, බත් පැකට්ටුවක් සඳහා රුපියල් 130ක්, ආප්පයක් රුපියල් 15ක් සහ කිරි තේ කෝප්පයක් රුපියල් 40ක් දක්වාත් ආදී වශයෙන් උපරිම මිලක් පැනවීමට තම සංගමය තීරණය කළ බව එම සංගමයේ ජාතික සංවිධායක අසේල සම්පත් මහතා ලංකාදීපයට පැවසීය.
මේ අනුව එළවලූ වර්ග 3ක්, මාළු කැබැල්ලක්, පළා වර්ගයක්, පපඩම් සහ බැදපු මිරිස් සහිත බත් පැකට්ටුවක් රුපියල් 130ක උපරිම මිලකට අලෙවි කළ යුතු බවට තීරණය කර ඇතැයි ද ඔහු සඳහන් කළේය.
වෙනත් ආහාර වට්ටෝරු සහිත බත් පැකට් සඳහා මෙම උපරිම මිල අදාළ නොවන බව ද අසේල සම්පත් මහතා ප‍්‍රකාශ කළ අතර මෙම තීරණය පිළිබඳව ලිපියක් මගින් පාරිභෝගික කටයුතු අධිකාරිය දැනුම්වත් කර තිබෙන බව ද ඔහු කීවේය.