(බන්දු තඹවිට සහ ප්‍රේමතිලක පෙරමුණ)
 
කළුතර දිස්ත්‍රික් පාර්ලිමේන්තු මන්ත්‍රී සහ හිටපු අමාත්‍ය කුමාර වෙල්ගම මහතාට ශ්‍රී ලංකා පොදුජන පෙරමුණට එක්වී මෙවර ජනාධිපතිවරණයට සහයෝගය දක්වන ලෙස ඉල්ලා භික්ෂුන්වහන්සේලා දෙනමක් සහ තවත් ආධාරකරුවෝ තිදෙනෙක් අද(17) මතුගම නගරයේදී සත්‍යග්‍රහයක් ආරම්භ කළහ.
 
මෙම සත්‍යග්‍රහයට තෙබුවන ග්‍රන්තාකර පිරිවෙන් විහාරාධිපති තෙබුවන ඥානින්ද නායක හිමියන්, බොන්දුපිටියේ නාගතිස්ස හිමියන්, මාවිට ඤාණරතන හිමියන් සමග ප්‍රභාත් විජේවර්ධන, දුමින්ද දයාශාන්ත සහ නාලක සමර සිංහ යන පිරිසද එක්ව සිටියහ.
 
 මතුගම ප්‍රාදේශීය සභාවේ සභාපති මෙරිල් මුණසිංහ ඇතුළු පොදුජන පෙරමුණේ මන්ත්‍රීවරු සහ අධාරකරුවෝ පිරිසක් එක්වී සිටියහ.
 
මෙහිදී අදහස් දැක්වූ තෙබුවන ඥානින්ද නායක හිමියන් පැවසුවේ කළුතර දිස්ත්‍රික් ජනතාවගෙන් වැඩිම මනාප ප්‍රමාණයක් ලබාගෙන තේරී පත්වූ කුමාර වෙල්ගම මහතාගේ සහයෝගය මේ අවස්ථාවේ රටේ අනාගතය තීරණය කිරීමට ඉතාම අවශ්‍ය බවත්, ඒ මහතා තවදුරටත් නිහඬව නොසිට ක්‍රියාකාරී දේශපාලනයට පිවිස ශ්‍රී ලංකා පොදුජන පෙරමුණට එක්විය යුතු බවත්ය. ඒ සඳහා  මෙම සත්‍යග්‍රහය ආරම්භ කරන බවත් ඒ සඳහා අද දිනයේ යහපත් ප්‍රතිචාරයක් නොමැති වූවහොත් සත්‍යග්‍රහයේ යේදී සිටින පිරිස මාරාන්තික උපවාසයක් දක්වා ගෙන යාමට තීරණය කර ඇති බවත් හිමියෝ ප්‍රකාශ කළහ.

(ඡායාරූප - බන්දු තඹවිට) 

 (ඡායාරූප - ප්‍රේමතිලක පෙරමුණ)