(*** සුජිත් හේවාජුලිගේ)

වැලිසර කඳවුරේ පැතිර ගිය කොරෝනා වසංගතය අවසන් හෙයින් ඒ කඳවුර සාමාන්‍ය කටයුතු සඳහා යළි විවෘත කළ හැකි බවට සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා නාවික හමුදාපති වයිස් අද්මිරාල් පියල් ද සිල්වා මහතාට ඊයේ (18) නිල වශයෙන් දැනුම් දී ඇත.

වැලිසර නාවික හමුදා කඳවුර මේ වන විට සුරක්ෂිත කලාපයක් බවට පත්ව ඇතැයි වසංගත රෝග විද්‍යා අංශය සෞඛ්‍ය සේවා අධ්‍යක්ෂ ජනරාල්වරයාට දැනුම් දී තිබූ අතර ඔහු ඒ බව නාවික හමුදාපතිවරයාට දැනුම් දී ඇත්තේ ඉන් පසුවය.

වැලිසර නාවික රෝහල හැරෙන්නට වැලිසර කඳවුරේ සියලුම අංශ මේ අනුව විවෘත කළ හැකි බව ද දැනුම් දී ඇත.

වැලිසර නාවික හමුදා රෝහල පමණක් ලබන 25 වැනිදායින් පසුව විවෘත කරන්නැයි නාවික හමුදා ප්‍රධානීන්ට දැනුම් දුන් බව වසංගත රෝග විද්‍යා අංශයේ විශේෂඥ වෛද්‍ය දීපා ගමගේ මහත්මිය ‘ලංකාදීප’යට ඊයේ (18) පැවැසුවාය.

වැලිසර නාවික හමුදා කඳවුරේ කොරෝනා පැතිරීම සම්පූර්ණයෙන්ම පාලනය කර ඇතැයි කී ගමගේ මහත්මිය නාවික භටයන්ගෙන් සියයට අනුවකට වැඩි පිරිසකගේ නිරෝධායන කටයුතු ද අවසන් වී ඇතැයි ප්‍රකාශ කළාය.

මේ සම්බන්ධයෙන් අප නාවික හමුදාපති වයිස් අද්මිරාල් පියල් ද සිල්වා මහතාගෙන් කළ විමසුමක දී ඔහු පැවැසුවේ නිශ්චිත සෞඛ්‍ය නිර්දේශ ලැබී ඇති හෙයින් වැලිසර නාවික කඳවුර අද හෙටම විවෘත කිරීමට පියවර ගන්නා බවයි.

කඳවුර විවෘත කිරීමට පූර්ණ විෂබීජහරණයකට ලක් කළ යුතුව තිබෙන බව ද නාවික හමුදාපතිවරයා සඳහන් කළේය.

කොරෝනා පැතිර යෑමත් සමග වැලිසර නාවික හමුදා කඳවුර හුදෙකලා කලාපයක් බවට පත් කෙරුණේ ඉකුත් අප්‍රියෙල් මස 23 වැනිදාය.