(රන්ජන් කටුගම්පොල සහ නිමන්ති රණසිංහ)

ත්‍රස්තවාදය වැළැක්වීමේ පනත සහ සිවිල් හා දේශපාලන අයිතීන් පිළිබද ජාත්‍යන්තර සම්මුති පනත ප්‍රකාරව චෝදනා ලැබ රක්ෂිත බන්ධනාගාර ගත කර සිටින නිතීඥ හිජාස් හිස්බුල්ලා මහතා ඇප මත මුදාහරින්නැයි ඉල්ලා ගොනුකළ ප්‍රතිශෝධන පෙත්සම ලබන 20 වැනිදාට යළි සලකා බැලීමට අභියාචනාධිකරණය අද (18) දින නියම කළේය.

මේනකා විජේසුන්දර සහ නීල් ඉද්දවෙල යන අභියාචනාධිකරණ විනිසුරු මඩුල්ල හමුවේ ඊයේ (18) යළි සලකා බැලූ අවස්ථාවේදී මෙම කරුණු ඉදිරිපත් විණී.

ත්‍රස්තවාදය වැළැක්වීමේ පනත සහ සිවිල් හා දේශපාලන අයිතීන් පිළිබද ජාත්‍යන්තර සම්මුති පනත ප්‍රකාරව නිතීඥ හිජාස් හිස්බුල්ලා මහතාට එරෙහිව නිතිපතිවරයා විසින් පුත්තලම මහාධිකරණය හමුවේ අධිචෝදනා ගොනු කරනු ලැබ ඇතැයි මෙම පෙත්සමේ සදහන් කර ඇත.

එම නඩුවට අදාළව ත්‍රස්තවාදය වැළැක්වීමේ පනතේ 15 (1) වගන්තිය ප්‍රකාරව සහ සිවිල් හා දේශපාලන අයිතීන් පිළිබද ජාත්‍යන්තර සම්මුති පනත ප්‍රකාරව පුත්තලම මහාධිකරණ විනිසුරුවරයාට හිජාස් හිස්බුල්ලා මහතා ඇප මත මුදා හැරීමට බලයක් නොමැති බවට සදහන් කරමින් ඇප ප්‍රතික්ෂේප කර රක්ෂිත බන්ධනාගාර ගත කර ඇතැයි ද එම පෙත්සමෙන් දක්වා තිබේ.

ඒ අනුව, අගතියට පත් නිතීඥ හිජාස් හිසුබුල්ලා මහතා විසින් මෙම තීරණය ප්‍රතිශෝධනය කරන ලෙසට ඉල්ලා අදාළ පත්සම ඉදිරිපත් කර ඇති අතර, එය විභාගයට ගැනීමට අවසර ලබා දෙන ලෙස ද පෙත්සම්කරු අධිකරණයෙන් ඉල්ලා ඇත.