(යොහාන් භාසුර සහ ටී.කේ.ජි.කපිල)

රුපියල් කෝටි දෙකහමාරකට අධික වටිනාකමින් යුත් මෙතෆෙටමින් අඩංගු එක්සටසි නමැති මත්පෙති 4000 අධික ප්‍රමාණයක් ශ්‍රී ලංකා රේගුවේ මධ්‍යම තැපැල් හුවමාරු අංශයේ නිලධාරීන් අත්අඩංගුවට ගත් බව රේගු මාධ්‍ය ප්‍රකාශක නියෝජ්‍ය රේගු අධ්‍යක්ෂ සුදත්ත සිල්වා මහතා පැවසීය.

නෙදර්ලන්තයේ සිට යාපනයේ පදිංචි පුද්ගලයකු වෙත ඒවා තිබූ පාර්සලයක් පරීක්ෂා කිරීමේදී එහි සූක්ෂ්ම ලෙස මෙම මත්පෙති තොගය සඟවා සඟවා තිබූ බව රේගු මාතෘ ප්‍රකාශකවරයා පවසයි.

ඇද ඇතිරිලි සහ සෙල්ලම් බඩු මෙම පාර්සලයේ අඩංගු බවට රේගුවට ප්‍රකාශ කර එහි කාඩ්බෝඩ් බිත්ති තුළ ඉතා සූක්ෂ්ම ලෙස මෙම මත්පෙති සඟවා තිබූ බව කී රේගු මාධ්‍ය ප්‍රකාශකවරයා මෙම මත්පෙති තොගයේ බර ග්‍රෑම් 1600ක් පමණ වන බවද සඳහන් කළේය.

මෙම පාර්සලය නිෂ්කාශනය කර ගැනීමට මධ්‍යම තැපැල් හුවමාරු අංශය වෙත පැමිණ සිටි වැල්ලවත්ත ප්‍රදේශයේ පදිංචි පුද්ගලයකු මේ වන විට ශ්‍රී ලංකා රේගුව අත්අඩංගුවට ගෙන ඇති බවත් මෙම මත් පෙති ආනයනය පිළිබඳ මූලික විමර්ශන කටයුතු රේගු මත්ද්‍රව්‍ය පාලන අංශයේ නිලධාරීන්  සිදු කරනු ලබන අතර වැඩිදුර විමර්ශන කටයුතු සඳහා සැකකරු සහ මත්පෙති තොගය පොලිස් මත් ද්‍රව්‍ය කාර්යාංශයේ නිලධාරීන්ට භාර දීමට නියමිත බවත් රේගු මාධ්‍ය ප්‍රකාශකවරයා වැඩිදුරටත් කීය.