(විනීතා එම් ගමගේ)

ආණ්ඩුවේ මැති ඇමතිකම් දරන ශ්‍රී ලංකා නිදහස් පක්ෂයේ 24 දෙනා එක්සත් ජාතික පක්ෂය හදන ආණ්ඩුවකට කිසිසේත්ම එක් නොවන බව ස්ථිර යැයි එක්සත් ජනතා නිදහස් සන්ධානයේ මහලේකම් කෘෂිකර්ම අමාත්‍ය මහින්ද අමරවීර මහතා ප්‍රකාශ කළේය.

මෙය රට  ගැන ප්‍රශ්නයක් යැයි කී අමාත්‍යවරයා රට අස්ථාවර වීමට ඉඩ නොතැබීම තම කණ්ඩායමේ මතය යැයි පැවසීය. හිටි හැටියේ ඉවත්ව ගිය 16 දෙනා යැයි කියූ දැන් 15 දෙනාගේ කණ්ඩායමට සිදුව ඇත්තේ කුමක්දැයි විමසිය යුතු බව ද හෙතෙම කියා සිටියේය.

ඉරිදා පත්තර බැලූ විට ආණ්ඩුව පසුදාම පෙරළෙනු ඇතැයි සිතෙන නමුත් එලෙසින් ආණ්ඩු පෙරළන්නට හැකියාවක් ඇත්දැයි තමන් නොදන්නා බව අමරවීර මහතා කීය.

ශ්‍රී ලංකා නිදහස් පක්ෂ ආණ්ඩුවක් සාදාගන්නට තමන් ද කැමති අතර එය කළ යුතු විධිමත් ක්‍රමයක් පවතින්නේ යැයි ද හෙතෙම කියා සිටියේය.

එක්සත් ජනතා නිදහස් සන්ධානයට තබා එක්සත් ජාතික පක්ෂයටත් තනිව ආණ්ඩුවක් හැදිය නොහැකි යැයි කී අමාත්‍යවරයා මේ යථාර්ථය සියලු දෙනා වටහා ගත යුතු යැයි ද ඔහු පැවසීය.

පළාත්  පාලන ඡන්දය පැවැත්වූ නව ක්‍රමයේ යම් යම් අඩුපාඩු පැවතියත් මනාප වලින් තොරව කටයුතු කරන්නට  ලැබීම හා කාන්තාවන් විශාල පිරිසකට එහි අවස්ථාව ලැබීම යන කරුණු  එහි ප්‍රයෝජන යැයි අමරවීර මහතා කියා සිටියේය.

ශ්‍රී ලංකාවේ කාන්තාවන්, කාන්තා නියෝජිතවරියන්ට ඡන්දය දෙන්නට අකමැති බව පෙනෙතියි කී ඇමති අමරවීර එම තත්ත්වය වෙනස් කිරීමට කාන්තා නියෝජිතවරියන් පියවර ගත යුතු බව ද සඳහන් කළේය.

ඉදිරි පළාත් සභා මැතිවරණයේදීත් මේ ආකාරයෙන්ම  කාන්තාවන්ට වැඩි අවස්ථා ලැබෙන පරිදි කටයුතු කිරීමට බලාපොරොත්තු වන බවත් අද පළාත් පාලන ආයතනවල දකින  මුහුණු පාර්ලිමේන්තු මැතිවරණයකදී ද දක්නට හැකි වේවායි තමා සිතන බවත් අමරවීර මහතා තවදුරටත් පැවසීය.

එක්සත් ජනතා නිදහස් සන්ධානයේ මහලේකම්වරයා මේ අදහස් පළ කළේ ශ්‍රී ලංකා නිදහස් පක්ෂයේ කාන්තා සංවිධානය විසින් බස්නාහිර පළාතේ පළාත් පාලන ආයතනවල මන්ත්‍රීවරියන් වෙනුවෙන් සංවිධානය කොට තිබූ වැඩමුළුවක් අමතමිනි. මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයේ සහයෝගයෙන් මෙම වැඩමුළුව පැවැත්විණි.