(නිමල කොඩිතුවක්කු)

සාමකාමී විරෝධතාකරුවන්ට පහර දීමේ පළමු  විත්තිකරු අගමැති  මහින්ද රාජපක්ෂ බැවින් වහාම ඔහු අත්අඩංගුවට ගෙන නීතිය ක්‍රියාත්මක කරන ලෙස පොලාස්පතිවරයාගෙන් ඉල්ලිමක් කරන බව සමගි ජනබලවේගයේ මහලේකම් පාර්ලිමේන්තු මන්ත්‍රී රංජිත් මද්දුමබණ්ඩාර මහතා කොළඹදී අද (9) පැවසීය.

ජනාධිපති ඇතුලු ආණ්ඩුවම ඉවත් වනතෙක් මින් ඉදිරියට කිසිදු සාකච්ඡාවකට හෝ වැඩපිලිවලකට සමගි  ජනබලවේගය එක් වන්නේ හෝ සහයෝගය ලබා නොදෙන බවත් මහලේකම්වරයා සඳහන් කළේය.

ජනාධිපති, ඇතුලු ආණ්ඩුව ඉවත් වන්නේ නම් පමණක්   ජනතාව වෙනුවෙන් රට භාරගැනීමට සමගි ජනබලවේගය ඉදිරිපත්  වන බවත් කොළඹ විපක්ෂනායක කාර්යාලයේ පැවති මාධ්‍ය හමුවකට එක්වෙමින්  ඔහු මේ බව පැවසීය.

රටේ විපක්ෂනායකට, සාමකාමිව විරෝධය  පලකරන තරුණ තරුණයින්ට පහර දෙද්දී   නීතිය ක්‍රීයාත්මක නොකරන්නේ ඇයිද යන්න සම්බන්ධයෙන් පොලිස්පතිවරයාගෙන් ප්‍රශ්ණ කරන බවත් මහලේකම්වරයා එහිදී පැවසීය.

ජන පීඩිත රාජපක්ෂ ආණ්ඩුවට ගෙදර යන තෙක් ඔවුන්ට එරෙහිව එරෙහිව  රටේ ජනතාව පාරට බස්සවා විරෝධය පළකරන බවත් ඔහු කීවේය.

රාජපක්ෂලා බේරාගැනීමට යෙදවූ හදිසි නීතියට සහ  ඇදිරිනීතියට ඇහම්කන් දීමෙන් වලකින්නේ යැයිද ඔහු එහිදී ජනතාවගෙන් ඉල්ලීමක්ද කළේය.